Májiliste otyrǵanda dál osy Bojko "Aqjol" partiiasyn "aidaǵany bes eshki, ysqyryǵy jer jarady" degen syńaida synaǵan edi.
"Karavanǵa" bergen suhbatynda eks-depýtat "aqjoldyqtardy" popýlister dep atap, taǵy bir márte túirep ótipti.
"Ylǵi da urandatyp, jalaýlatyp júredi demeimin. Kóptegen aktýaldy máselelerdi kótere bildi bul partiia, kóterip te júr. Tek kei kezderi adamnyń qulaǵyna túrpidei tietin, aqylǵa syimaityn dańǵazalyqpen ainalysyp ketedi", – degen Bojko kommýnistik ideologiia ustyndaryna adal ekenin aitypty.
Sonyń ishinde Komsomol kúnin toilaý Bojko úshin buljymas mindet. "Aqjoldyń" tizginin ustaǵan Azat Perýashevpen osyǵan bailanysty sózge kelip qalǵan.
"Komsomoldyń 100 jyldyǵy qarsańynda "aqjoldyqtardyń" biri Májilistegi áriptesteri men partiialastaryn toimen quttyqtap, peiilin bildirgen edi. Sol-aq eken Perýashev dúr kóterildi, álgi depýtatty qaǵyp-silkip aldy. Bul elde komsomoldyń aty óshkenin aityp, Qazaqstan óz qoly óz aýzyna jetken derbes el ekenin eske saldy. Álgi jerde shalqamnan túse jazdadym, ashýǵa mingenim sonshalyq Perýashevpen kirjińdesip qaldyq", – deidi Bojko.
Al osynyń bárin syrttai baqylap otyrǵan sol tustaǵy Qazaqstan kommýnisteri Bojkoǵa ara túsýge asyqpaǵan kórinedi.
"Olar da "aqjol" sekildi aiǵaishyl. Meniń kezimde fraktsiia músheleriniń sany 7 adamnan turatyn edi. Azǵantai bolsa da Úkimettiń atyna ótkir saýal joldap, tynyp tappaityn", –deidi Bojko.
...
Eske salaiyq, osydan úsh jyl buryn sol tustaǵy Májilistiń vitse-spikeri Vladimir Bojko úkimet saǵatyn komsomoldyń 100 jyldyǵymen quttyqtaýmen ashqan. Al Seidýmanov siiaqty depýtattar komsomoldy adamzattyń uly ideiasyna qyzmet etti dep kósilgen.
"Komsomol adamzattyń eń joǵarǵy ideialaryna qyzmet etti. Qurannyń, Injildiń jáne basqa da kieli kitaptardyń ideialaryna, sol qoǵamnyń idealyna qyzmet etti. Kommýnizm ideia túrinde shyn máninde kieli qasietti edi. Ras, repressiiamen, durys basqarmaýmen ony búldirdi. Onyń atyna kir keltirgen – komsomoldar emes kommýnister", – degen edi Seidýmanov.
Al Qýanysh Sultanov "Komsomol toiy - 100 jylda bir ótetin ǵajap jiyn!" dep baǵa bergen.
Sol kezde Azat Perýashev bastaǵan birqatar májilismender bul kúndi mereke emes, qasiret kúni deý kerek dep Bojkony qorǵashtaǵan "komsomolshyl" depýtattardyń yzasyna tigen edi.
