Pavlodar oblysynyń Etikalyq keńesi Qoiandy aýyldyq okrýginiń ákimi Erjan Orazálimovke qatysty sheshim shyǵardy. Keńes ákimge "qatań sógis" túrinde tártiptik jaza qoldanýdy usyndy. Bul týraly Memlekettik qyzmet isteri agenttiginiń Pavlodar oblysy boiynsha departamenti basshysy, Etikalyq keńestiń tóraǵasy Mádi Ábildin málimdedi, dep habarlaidy Dalanews.kz.
Aita keteiik, ákim men veterinarlyq qyzmet mamany arasyndaǵy janjal qyrkúiek aiynda bolǵan. Ekeýi de Erjan Orazálimovtiń jieniniń týǵan kúnine qonaq bolyp barǵan. Olar burynnan birin-biri jaqsy biletin. Orazálimovtiń ózi de 12 jyl boiy veterinariia salasynda jumys istegen jáne soqqyǵa jyǵylǵan áriptesimen araqatynasy jaqsy bolǵanyn aitqan.
"Qaqtyǵystyń sebebi — ishimdik emes. Meniń ómirimniń keibir jeke tustaryna qatysty sóz qozǵaldy. Sol sátte kúizelis ústinde ashýǵa berilip, agressiia tanyttym. Bul áreketime ókinemin", — dedi ákim.
Ol jábirlenýshiden de, qoǵamnan da keshirim surap, eki taraptyń da bir-birine resmi shaǵym túsirmegenin atap ótti.
Buǵan deiin áleýmettik jelilerde aýyl ákimi men feldsher arasyndaǵy tóbeles týraly aqparat taraǵan edi. Politsiia departamentiniń málimetinshe, oqiǵa keshki ýaqytta, olardyń ekeýi de qyzmettik mindetin atqaryp júrgen sátte emes, jeke otyrys kezinde bolǵan. Qaqtyǵys kásibi qyzmetke qatysy joq, al taraptar tatýlasyp, bir-birine eshqandai talap qoimaǵan.
