پاۆلودار وبلىسىنىڭ ەتيكالىق كەڭەسى قوياندى اۋىلدىق وكرۋگىنىڭ اكىمى ەرجان ورازالىموۆكە قاتىستى شەشىم شىعاردى. كەڭەس اكىمگە "قاتاڭ سوگىس" تۇرىندە تارتىپتىك جازا قولدانۋدى ۇسىندى. بۇل تۋرالى مەملەكەتتىك قىزمەت ىستەرى اگەنتتىگىنىڭ پاۆلودار وبلىسى بويىنشا دەپارتامەنتى باسشىسى، ەتيكالىق كەڭەستىڭ ءتوراعاسى ءمادي ءابىلدين مالىمدەدى، دەپ حابارلايدى Dalanews.kz.

ايتا كەتەيىك، اكىم مەن ۆەتەرينارلىق قىزمەت مامانى اراسىنداعى جانجال قىركۇيەك ايىندا بولعان. ەكەۋى دە ەرجان ءورازالىموۆتىڭ جيەنىنىڭ تۋعان كۇنىنە قوناق بولىپ بارعان. ولار بۇرىننان ءبىرىن-بىرى جاقسى بىلەتىن. ءورازالىموۆتىڭ ءوزى دە 12 جىل بويى ۆەتەريناريا سالاسىندا جۇمىس ىستەگەن جانە سوققىعا جىعىلعان ارىپتەسىمەن اراقاتىناسى جاقسى بولعانىن ايتقان.

"قاقتىعىستىڭ سەبەبى — ىشىمدىك ەمەس. مەنىڭ ءومىرىمنىڭ كەيبىر جەكە تۇستارىنا قاتىستى ءسوز قوزعالدى. سول ساتتە كۇيزەلىس ۇستىندە اشۋعا بەرىلىپ، اگرەسسيا تانىتتىم. بۇل ارەكەتىمە وكىنەمىن"، — دەدى اكىم.

ول جابىرلەنۋشىدەن دە، قوعامنان دا كەشىرىم سۇراپ، ەكى تاراپتىڭ دا بىر-بىرىنە رەسمي شاعىم تۇسىرمەگەنىن اتاپ ءوتتى.

بۇعان دەيىن الەۋمەتتىك جەلىلەردە اۋىل اكىمى مەن فەلدشەر اراسىنداعى توبەلەس تۋرالى اقپارات تاراعان ەدى. پوليسيا دەپارتامەنتىنىڭ مالىمەتىنشە، وقيعا كەشكى ۋاقىتتا، ولاردىڭ ەكەۋى دە قىزمەتتىك مىندەتىن اتقارىپ جۇرگەن ساتتە ەمەس، جەكە وتىرىس كەزىندە بولعان. قاقتىعىس كاسىبي قىزمەتكە قاتىسى جوق، ال تاراپتار تاتۋلاسىپ، بىر-بىرىنە ەشقانداي تالاپ قويماعان.