Kúni keshe osynaý balalar úiinde «Rýhani jańǵyrý» baǵdarlamasy sheńberinde "Tildik kelisim" atty jobanyń tusaýy kesildi.
Sharanyń shymyldyǵyn túrgen oblystyq «Ana tili» ortalyǵynyń basshysy Sholpan Kinjikovanyń aityp ótkenindei, atalǵan joba oblystyq Tilderdi damytý basqarmasynyń muryndyq bolýymen osymen ekinshi jyl qatarynan ótkizilip otyr.
– Byltyrǵy jyly osy jobaǵa Pavlodardaǵy jáne Kenjekól aýylyndaǵy balalar úiinen áke-sheshe qamqorlyǵynsyz qalǵan 90-ǵa tarta balany tartqan edik. Biyl jobamyzǵa Tereńkól aýdanynyń balalar úiinen 39 bala atsalysyp otyr. Jobaǵa qatysyp jatqan jetkinshekterdiń 80 paiyzǵa jýyǵy ózge ult ókilderiniń balalary. Memlekettik tildi meńgermegen. Osynaý joba aiasynda olar qazaq tiliniń alǵysharttaryn oqyp-úirenetin bolady.
Jobanyń aýqymy munymen shektelip otyrǵan joq. Budan bólek, qyz balalarǵa qazaqtyń ulttyq taǵamdaryn ázirleýdi úiretetin bolamyz. Ainalyp kelgende, munyń barlyǵy olardyń erteńgi ómirinde aýadai qajet bolady, – deidi bul oraida Sholpan Kinjikova.
Jaqsy dástúrdiń biyl da jalǵasyn tabýyna balalardyń ynta-yqylasy, til úirenýge degen ushqyr umtylysy sebepshi bolypty.
Balalar úiiniń tárbielenýshileri aldaǵy 3 ai boiyna qunarly, shuraily qazaq tiliniń qyr-syryna qanyǵyp, atadan balaǵa taralǵan maqal-mátelder, jańyltpashtar, pátýáli sózder, kúndelikti pikir almasýǵa qajetti sóz tirkesterin meńgeretin bolady.
Kýrs barysynda balalardyń boiyna qazaq tiliniń qadir-qasietin sińire túsý maqsatynda qasietti jerlerge, mýzeilerge, teatrlarǵa saparlar uiymdastyrylady. Balalar úiiniń tárbielenýshileri áleýmettik mańyzy bar sharalarǵa qatysyp, tájiribelik sabaqtar men treningten ótedi.
Jetim balalarǵa qazaq tilin úiretý kýrsy 7 jasar balaqaidan bastap, 17 jasqa deiingi aralyqty qamtyp otyr.
– Sózime dálel, ótken aptada Tereńkól aýdanynyń aty ańyzǵa ainalǵan abyz aqsaqaly Sáidildá qajy Túitibekulynyń basyna baryp, Quran baǵyshtap qaittyq.
Sonymen birge balalar úiiniń tárbielenýshileri qazaq halqynyń ǵulama oishyly, kemeńger ǵalym, tarihshy Máshhúr Júsip Kópeiulynyń kesenesine baryp, kóptegen qyzyqty maǵlumatqa qanyǵyp qaitty.
Túptep kelgende, munyń bári óser urpaqtyń óne boiyna qazaq halqynyń bolmys-bitimin sińirýge sebepker bolady. Budan bólek, balalar qazaqtyń ádet-ǵurpy, tarihi tanymymen jete tanysýǵa múmkindik alady, – deidi osy oraida Sholpan Kinjikova.
Atalǵan jobanyń qorytyndysynda kýrsqa qatysýshylarǵa «Tildik kelisim» jobasynyń belgisi bar imidjdi syilyqtar men oqýlyqtar tabys etildi.
