پاۆلودار وبلىسى كەنجەكول اۋىلىندا وتباسى ۇلگىسىندە قۇرىلعان بالالار ءۇيى بار.

كۇنى كەشە وسىناۋ بالالار ۇيىندە «رۋحاني جاڭعىرۋ» باعدارلاماسى شەڭبەرىندە "تىلدىك كەلىسىم" اتتى جوبانىڭ تۇساۋى كەسىلدى.

شارانىڭ شىمىلدىعىن تۇرگەن وبلىستىق «انا ءتىلى» ورتالىعىنىڭ باسشىسى شولپان كىنجىكوۆانىڭ ايتىپ وتكەنىندەي، اتالعان جوبا وبلىستىق تىلدەردى دامىتۋ باسقارماسىنىڭ مۇرىندىق بولۋىمەن وسىمەن ەكىنشى جىل قاتارىنان وتكىزىلىپ وتىر.

– بىلتىرعى جىلى وسى جوباعا پاۆلودارداعى جانە كەنجەكول اۋىلىنداعى بالالار ۇيىنەن اكە-شەشە قامقورلىعىنسىز قالعان 90-عا تارتا بالانى تارتقان ەدىك. بيىل جوبامىزعا تەرەڭكول اۋدانىنىڭ بالالار ۇيىنەن 39 بالا اتسالىسىپ وتىر. جوباعا قاتىسىپ جاتقان جەتكىنشەكتەردىڭ 80 پايىزعا جۋىعى وزگە ۇلت وكىلدەرىنىڭ بالالارى. مەملەكەتتىك ءتىلدى مەڭگەرمەگەن. وسىناۋ جوبا اياسىندا ولار قازاق ءتىلىنىڭ العىشارتتارىن وقىپ-ۇيرەنەتىن بولادى.

جوبانىڭ اۋقىمى مۇنىمەن شەكتەلىپ وتىرعان جوق. بۇدان بولەك، قىز بالالارعا قازاقتىڭ ۇلتتىق تاعامدارىن ازىرلەۋدى ۇيرەتەتىن بولامىز. اينالىپ كەلگەندە، مۇنىڭ بارلىعى ولاردىڭ ەرتەڭگى ومىرىندە اۋاداي قاجەت بولادى، – دەيدى بۇل ورايدا شولپان كىنجىكوۆا.

جاقسى ءداستۇردىڭ بيىل دا جالعاسىن تابۋىنا بالالاردىڭ ىنتا-ىقىلاسى، ءتىل ۇيرەنۋگە دەگەن ۇشقىر ۇمتىلىسى سەبەپشى بولىپتى.



بالالار ءۇيىنىڭ تاربيەلەنۋشىلەرى الداعى 3 اي بويىنا قۇنارلى، شۇرايلى قازاق ءتىلىنىڭ قىر-سىرىنا قانىعىپ، اتادان بالاعا تارالعان ماقال-ماتەلدەر، جاڭىلتپاشتار، ءپاتۋالى سوزدەر، كۇندەلىكتى پىكىر الماسۋعا قاجەتتى ءسوز تىركەستەرىن مەڭگەرەتىن بولادى.

كۋرس بارىسىندا بالالاردىڭ بويىنا قازاق ءتىلىنىڭ قادىر-قاسيەتىن سىڭىرە ءتۇسۋ ماقساتىندا قاسيەتتى جەرلەرگە، مۋزەيلەرگە، تەاترلارعا ساپارلار ۇيىمداستىرىلادى. بالالار ءۇيىنىڭ تاربيەلەنۋشىلەرى الەۋمەتتىك ماڭىزى بار شارالارعا قاتىسىپ، تاجىريبەلىك ساباقتار مەن ترەنينگتەن وتەدى.

جەتىم بالالارعا قازاق ءتىلىن ۇيرەتۋ كۋرسى 7 جاسار بالاقايدان باستاپ، 17 جاسقا دەيىنگى ارالىقتى قامتىپ وتىر.

– سوزىمە دالەل، وتكەن اپتادا تەرەڭكول اۋدانىنىڭ اتى اڭىزعا اينالعان ابىز اقساقالى ءسايدىلدا قاجى تۇيتىبەك ۇلىنىڭ باسىنا بارىپ، قۇران باعىشتاپ قايتتىق.

سونىمەن بىرگە بالالار ءۇيىنىڭ تاربيەلەنۋشىلەرى قازاق حالقىنىڭ عۇلاما ويشىلى، كەمەڭگەر عالىم، تاريحشى ءماشھۇر ءجۇسىپ كوپەي ۇلىنىڭ كەسەنەسىنە بارىپ، كوپتەگەن قىزىقتى ماعلۇماتقا قانىعىپ قايتتى.



تۇپتەپ كەلگەندە، مۇنىڭ ءبارى وسەر ۇرپاقتىڭ ونە بويىنا قازاق حالقىنىڭ ءبولمىس-بىتىمىن سىڭىرۋگە سەبەپكەر بولادى. بۇدان بولەك، بالالار قازاقتىڭ ادەت-عۇرپى، تاريحي تانىمىمەن جەتە تانىسۋعا مۇمكىندىك الادى، – دەيدى وسى ورايدا شولپان كىنجىكوۆا.

اتالعان جوبانىڭ قورىتىندىسىندا كۋرسقا قاتىسۋشىلارعا «تىلدىك كەلىسىم» جوباسىنىڭ بەلگىسى بار ءيميدجدى سىيلىقتار مەن وقۋلىقتار تابىس ەتىلدى.