Pavlodar oblystyq máslihatynyń depýtaty ári Aqtogai Milk kásipornynyń iesi Aleksandr Terentev alty jumysshynyń qazasyna qatysty is boiynsha ustaldy, dep habarlaidy dalanews.kz.
Qaiǵyly oqiǵa 20 shildede Pavlodar oblysynyń Aqtoǵai aýdanyndaǵy kásiporyn aýmaǵynda bolǵan. Jabdyqtarǵa qyzmet kórsetý kezinde alty adam kóz jumǵan. Pavlodar oblystyq politsiia departamenti Terentevtiń ustalǵanyn rastady. Vedomstvo málimetinshe, atalǵan derek boiynsha sotqa deiingi tergeý júrgizilip jatyr.
Is aiasynda barlyǵy úsh kúdikti ustalǵan. Olar ýaqytsha ustaý izoliatoryna qamaldy. Politsiia ázirge oqiǵaǵa qatysty ózge málimetterdi jariialaǵan joq.
Eske salaiyq, buǵan deiin Pavlodar oblysynyń Aqtoǵai aýdanyndaǵy Jolaman aýylynda ornalasqan Aqtogai Milk JShS aýmaǵynda káriz qudyǵyndaǵy elektr sorǵysynyń aqaýyn jóndeý kezinde alty jumysshy qaza taýyp, taǵy bir adam aýrýhanaǵa jetkizilgeni habarlanǵan. Qaza bolǵandardyń biri kámeletke tolmaǵan jasóspirim bolǵan. Áleýmettik jelilerde kóz jumǵandardyń arasynda bir otbasynyń úsh múshesi – ákesi men eki uly bolǵany týraly aqparat taraǵanymen, bul málimet ázirge resmi túrde rastalǵan joq.
Artynsha alty adam qaza bolǵan Pavlodardaǵy sút fermasy máslihat depýtaty Aleksandr Terentevke tiesili ekeni belgili boldy.
