– Qazirgi kezde oblystaǵy barlyq mektepter bastaýysh synyp oqýshylaryna tegin tamaq uiymdastyrýdy bastady, – deidi Pavlodar oblysy bilim berý basqarmasynyń bas mamanynyń m.a. Abaeva Ainagúl. – Bul qoldaý áleýmettik mártebesine qaramastan barlyq bastaýysh synyp oqýshylaryna qatysty bolady.
Ainagúl Abaevanyń aitýynsha, bul jańashyldyq aldymen oqýshylardyń durys tamaqtanýyna septigin tigizip, áleýmettik jaǵdaidyń jaqsarýyna yqpal etedi. As máziri boiynsha oqýshylarǵa birinshi, ekinshi taǵamdar, nan jáne sýsyn, 5 gramm bal beriledi. Aýdandyq jerlerde aptasyna bir ret salattar men jemister beriledi.
Pavlodar oblysynda 40 myńnan astam oqýshy oblystyq biýdjettiń esebinen tamaqtanady. 500 oqýshy sharýa qojalyqtarynyń demeýshiliginiń arqasynda tegin tamaqpen qamtylady. Demeýshilerdiń qatarynda «Lýgansk» ÓK, «Pobeda» jáne «Galitskoe» JShS-teri, «Nadejda», «Arman», «Shkýrko» jáne «Rodnik» sharýa qojalyqtary bar.
– Meniń jalǵyz qyzym osy mekteptiń birinshi synybynda oqidy, – deidi ata-analardyń biri Altyn Ysqaqova. – Buryn qyzyma aptasyna tamaqqa eki myńǵa jýyq aqsha berýshi edim. Biz úshin bul asa qomaqty qarajat bolmasa da, otbasylyq biýdjetimiz únemdeletin boldy. Oblys ákimi ýáde etkendei balalarymyz tegin tamaqtana bastady. As máziri jaqsy ári taǵamdar ózgerip turady. Ata-analardyń atynan aimaq basshysyna alǵys bildiremin.
2019 jyly óńirde memlekettik-jekeshelik áriptestik sheńberinde Pavlodar qalasynyń 11 mektebi qatysqan eki joba júzege asyryldy. Osy jobalar boiynsha mektep ashanalaryn jańǵyrtýǵa jeke investitsiialar tartý kózdeldi. Investorlar ashanalarǵa jańa qural-jabdyqtar satyp alyp, olardyń ishin jóndedi. Oblystyq bilim berý basqarmasynyń mamandary bul joba óńirdiń ózge mektepterinde jalǵasatynyn atap ótti.
Pavlodar oblysy ákiminiń baspasóz qyzmeti
Sýretterdi túsirgen Aleksei Kiiatkin
