Ótken jyldyń qazan aıynda óńir mektepteriniń qamqorshylyq keńesteriniń ókilderimen kezdesý kezinde Pavlodar oblysynyń ákimi 2020 jyldan bastap óńirdiń bastaýysh synyptarynda oqıtyn balalar tegin tamaqpen qamtylatynyn aıtqan edi. Osy maqsatqa oblys búdjetinen bir mıllıard teńgeden astam qarajat bólindi. Sonymen qatar, qarjylandyrý jappaı oqytý qory, aýdandyq búdjetter jáne demeýshiler qarajaty esebinen júrgiziletin bolady. Ekinshi oqý jartyjyldyǵynyń alǵashqy kúninde óńir jýrnalıseri oblys ortalyǵyndaǵy №25 jalpy orta bilim berý mektebine baryp, mán-jaımen tanysty.
– Qazirgi kezde oblystaǵy barlyq mektepter bastaýysh synyp oqýshylaryna tegin tamaq uıymdastyrýdy bastady, – deıdi Pavlodar oblysy bilim berý basqarmasynyń bas mamanynyń m.a. Abaeva Aınagúl. – Bul qoldaý áleýmettik mártebesine qaramastan barlyq bastaýysh synyp oqýshylaryna qatysty bolady.
Aınagúl Abaevanyń aıtýynsha, bul jańashyldyq aldymen oqýshylardyń durys tamaqtanýyna septigin tıgizip, áleýmettik jaǵdaıdyń jaqsarýyna yqpal etedi. As máziri boıynsha oqýshylarǵa birinshi, ekinshi taǵamdar, nan jáne sýsyn, 5 gram bal beriledi. Aýdandyq jerlerde aptasyna bir ret salattar men jemister beriledi.
– Ár balaǵa búdjetten 300 teńge bólinedi. Bizdiń mektepte bastaýysh synyptarda 842 oqýshy bilim alady, – deıdi №25 mekteptiń qoǵamdyq tamaqtaný tehnology ári ashana meńgerýshisi Baqyt Ábdirahmanova. – Biz bul naryqta burynnan jumys istep kele jatyrmyz. Taýar jetkizýshiler sapaly ónimder ákeledi. Ár aıdyń sońynda bizge atqarylǵan jumystyń kólemine qaraı tıisti qarjy aýdarylady. Ashyq satylymda ystyq tamaqtyń quny 450-500 teńgeni quraıdy. Biz jyldyń sońyna deıin jumys isteımiz. Sáıkesinshe baǵalar da burynǵy deńgeıde qala beredi.
Pavlodar oblysynda 40 myńnan astam oqýshy oblystyq búdjettiń esebinen tamaqtanady. 500 oqýshy sharýa qojalyqtarynyń demeýshiliginiń arqasynda tegin tamaqpen qamtylady. Demeýshilerdiń qatarynda «Lýgansk» ÓK, «Pobeda» jáne «Galıskoe» JSHS-teri, «Nadejda», «Arman», «Shkýrko» jáne «Rodnık» sharýa qojalyqtary bar.
– Meniń jalǵyz qyzym osy mekteptiń birinshi synybynda oqıdy, – deıdi ata-analardyń biri Altyn Ysqaqova. – Buryn qyzyma aptasyna tamaqqa eki myńǵa jýyq aqsha berýshi edim. Biz úshin bul asa qomaqty qarajat bolmasa da, otbasylyq búdjetimiz únemdeletin boldy. Oblys ákimi ýáde etkendeı balalarymyz tegin tamaqtana bastady. As máziri jaqsy ári taǵamdar ózgerip turady. Ata-analardyń atynan aımaq basshysyna alǵys bildiremin.
2019 jyly óńirde memlekettik-jekeshelik áriptestik sheńberinde Pavlodar qalasynyń 11 mektebi qatysqan eki joba júzege asyryldy. Osy jobalar boıynsha mektep ashanalaryn jańǵyrtýǵa jeke ınvestısıalar tartý kózdeldi. Investorlar ashanalarǵa jańa qural-jabdyqtar satyp alyp, olardyń ishin jóndedi. Oblystyq bilim berý basqarmasynyń mamandary bul joba óńirdiń ózge mektepterinde jalǵasatynyn atap ótti.
Pavlodar oblysy ákiminiń baspasóz qyzmeti
Sýretterdi túsirgen Alekseı Kıatkın
