Pavlodar oblysynyń Aqsý qalasynda polısıa qyzmetkerleri shamamen 300 keli esirtki tárkiledi, dep habarlaıdy Dala News.
İshki ister mınıstrliginiń málimetinshe, qoıma qaladaǵy garaj kooperatıvteriniń birinen anyqtalǵan. Operasıany QAJ komıtetiniń №63 mekemesi men Pavlodar oblysy polısıa departamentiniń uıymdasqan qylmysqa qarsy kúres basqarmasy birlesip júrgizgen.
Jedel is-sharalar barysynda ósimdik tektes zat salynǵan 13 qap tárkilengen. Jalpy salmaǵy 300 kelige jýyq. Barlyq zattar sot-hımıalyq saraptamaǵa jiberildi.
Taınık tergeý ızolátorynda otyrǵan adammen júrgizilgen jumys barysynda anyqtalǵan. Onyń esirtki aınalymyna qatysy bolýy múmkin degen málimetter operasıa ótkizýge negiz bolǵan.
Qazirgi ýaqytta quqyq qorǵaý organdary esirtki jetkizý arnalary men osy iske qatysy bar barlyq tulǵalardy anyqtaý jumystaryn jalǵastyryp jatyr.
Materıaldar zańnamaǵa sáıkes prosesýaldyq sheshim qabyldaý úshin tıisti organdarǵa joldanǵan.
