پاۆلودار وبلىسىنىڭ اقسۋ قالاسىندا پوليسيا قىزمەتكەرلەرى شامامەن 300 كەلى ەسىرتكى تاركىلەدى، دەپ حابارلايدى Dala News.
ىشكى ىستەر مينيسترلىگىنىڭ مالىمەتىنشە، قويما قالاداعى گاراج كووپەراتيۆتەرىنىڭ بىرىنەن انىقتالعان. وپەراسيانى قاج كوميتەتىنىڭ №63 مەكەمەسى مەن پاۆلودار وبلىسى پوليسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى بىرلەسىپ جۇرگىزگەن.
جەدەل ءىس-شارالار بارىسىندا وسىمدىك تەكتەس زات سالىنعان 13 قاپ تاركىلەنگەن. جالپى سالماعى 300 كەلىگە جۋىق. بارلىق زاتتار سوت-حيميالىق ساراپتاماعا جىبەرىلدى.
تاينيك تەرگەۋ يزولياتورىندا وتىرعان اداممەن جۇرگىزىلگەن جۇمىس بارىسىندا انىقتالعان. ونىڭ ەسىرتكى اينالىمىنا قاتىسى بولۋى مۇمكىن دەگەن مالىمەتتەر وپەراسيا وتكىزۋگە نەگىز بولعان.
قازىرگى ۋاقىتتا قۇقىق قورعاۋ ورگاندارى ەسىرتكى جەتكىزۋ ارنالارى مەن وسى ىسكە قاتىسى بار بارلىق تۇلعالاردى انىقتاۋ جۇمىستارىن جالعاستىرىپ جاتىر.
ماتەريالدار زاڭناماعا سايكەس پروسەسسۋالدىق شەشىم قابىلداۋ ءۇشىن ءتيىستى ورگاندارعا جولدانعان.
