Pavlodar oblysynyń ákiminiń týǵan ápkesi mas kúiinde kólik júrgizgeni úshin ustaldy. Ol 7 jylǵa júrgizýshi kýáliginen aiyrylyp,15 táýlikke qamaýǵa alyndy. Bul týraly jýrnalist Mihail Kozachkov jazdy, dep habarlaidy Dalanews.kz.
Jýrnalistiń sózinshe, bir ai buryn Ekibastuzda politsiia patrýli Hyundai Tucson kóligin toqtatyp, júrgizýshisi áiel adamdy ustaǵan. Júrgizýshiden alkogol iisi ańqyp turǵan, sondyqtan ony narkologiialyq dispanserge jetkizip, munda onyń jeńil dárejedegi mas kúiinde ekeni anyqtaldy. Osyǵan bailanysty politsiia qyzmetkerleri ákimshilik quqyq buzý týraly kodekstiń 608-babynyń 1-bóligi boiynsha hattama jasady.
"Is sotqa berildi, onda quqyq buzýshy áiel, shyn máninde, kólikpen eshqaida barmaǵanyn, tek óz kóliginde otyrǵanyn, sebebi kóshede tońyp qalǵanyn jáne jylyný úshin kóliktiń ishinde otyrǵanyn aitty. Áiel sál ishkenin joqqa shyǵarmady. Oqiǵa osylai bolǵanyn Kýlikov degen adam da rastaǵan. Ol ózin áieldiń jeke júrgizýshisi retinde tanystyryp, kólik onyń úiiniń janynda turǵanyn, iesi keibir zattaryn alyp ketý úshin kelgenin aitty. Er adam kólikti ashyp, birge otyrǵandaryn, sol kezde kútpegen jerden politsiia kelgenin jetkizdi. Kýlikov kóliktiń ornynan qozǵalmaǵanyn aitty", - deidi jýrnalist.
Alaida patrýl qyzmetkerleri oqiǵa múlde basqasha bolǵanyn aitqan. Politsiia qyzmetkerleri Toqtasynov pen Nurkenov júrip kele jatqan kólikti toqtatqanyn, onda tek áieldiń bolǵanyn, Kýlikovtyń kólikte bolmaǵanyn, biraq alkogol iisiniń sezilgenin aitty.
Sondyqtan sot politsiia qyzmetkerleriniń áreketi durys dep sheshken, hattama zańdy túrde jasalǵan, quqyq buzýshylyq rastalǵan. Sýdia Elýbai Serikpaev quqyq buzýshyny 7 jylǵa kólik júrgizý quqyǵynan aiyrdy jáne 15 táýlikke qamaýǵa alǵan.
"Qosymsha aita ketetin nárse, bizdiń keiipkerimizdiń esimi – Aigúl Qýandyqqyzy Baihanova, 53 jasta, Pavlodar oblysynyń ákimi Asaiyn Baihanovtyń ápkesi (ony kase.kz arqyly, tipti JSN boiynsha tekserýge bolady)", - deidi Kozachkov.
Jýrnalist Mihail Kozachkov eki mańyzdy jaitqa nazar aýdarý keregin atap ótti.
"Birinshiden, politsiia qyzmetkerleri men sýdia ataqty familiiadan qoryqpai, óz jumysyn sońyna deiin oryndady. Patrýldi marapattaý kerek. Ekinshiden, oblys ákimi óz týysyn jazadan qutqarmady, iaǵni kez kelgen quqyq buzýshylyqqa nóldik tózim kórsetkenin kórsetti. Zań bárine ortaq", - deidi jýrnalist.
