Respublica partiiasynyń tóraǵasy Aidarbek Qojanazarovtyń Abai Qunanbaiuly týraly aitqan pikiri áleýmettik jelide qyzý talqylanyp jatyr, dep habarlaidy dalanews.kz.
Qojanazarov Abaidyń uly aqyn bolyp qalyptasýyna ákesiniń dáýleti múmkindik bergenin aityp, osy oidy kásipkerlerdi qoldaýdyń mańyzymen bailanystyrǵan.
“Abaidy Abai qylǵan – Qunanbaidyń maly. Eger Qunanbaidyń maly bolmasa, Abai Abai bolmaityn edi. Sebebi ýaqyty bolmai, qoi baǵyp ketetin edi. Sondyqtan bizdiń partiia Qunanbailardyń sany kóp bolsyn dep, olardy qoldaidy. Qunanbailar neǵurlym kóp bolsa, elimizde Abailar da soǵurlym kóp bolady”, - deidi ol.
Alaida partiia tóraǵasynyń bul pikiri áleýmettik jeli qoldanýshylarynyń synyna ushyrady. Jelide onyń Abaidyń tulǵa retinde qalyptasýyn Qunanbaidyń dáýletimen bailanystyrýyn orynsyz dep baǵalaǵan pikirler tarady. Keibir qoldanýshylar Qojanazarovtyń sózin uly aqynnyń murasy men tulǵasyna qurmetsizdik dep qabyldap, odan kópshilik aldynda túsinikteme berýdi, tipti keshirim suraýdy talap etip jatyr.
“Ne deiik, uly aqynnyń óz sózimen aitsam: “betti bastym, qatty sastym, tura qashtym, jalma-jan”, - dep jazǵan fb belsendisi Arman Sqabyluly.
