Májilis depýtaty Ermurat Bápi depýtattyq saýalynda Prezidenttiń Qazaqstan halqyna joldaýy týrasynda pikir bildirdi, dep habarlaidy Dalanews.kz.
Depýtattyń sózinshe, bul joldaý basqalardan áldeqaida ózgerek bolyp tur. Oǵan birneshe sebep bar.
"Prezidenttiń ózi aitqandai, "jańa geosaiasi tártip ornyǵa bastaǵan" búgingi teńselip, terbetilip turǵan qubylmaly álemniń jaǵdaiynda Memleket basshysy eldi jańa saiasi ózgeristerge jetelegen bastamalaryn jariia etti. Bálkim tórtkúl dúniede alai-dúlei tolqyn týyp turǵan daýyldy dáýirde áliptiń artyn baǵyp, bizdiń tynysh jata turǵanymyz durys pa edi? Qazaqshalap aitqanda, "jaý alyp bara jatqan" eshteńe joq edi... Biraq Prezident osyndai aýmaly-tókpeli zamanda "meniń maqsatym – eldiń turaqtylyǵy men qaýipsizdigin qamtamasyz etý" dep, bolashaqtyń qamyn kúittegen qadamǵa bastamashy boldy. Memleket basshysy bolashaqtyń baǵdaryn, jasampaz jańalyqty jariia etti. Eshkim májbúr etpedi, qarapaiym qaǵytyp aitqanda, ony "eshkim ony tilinen tartqan joq". Buny eldegi ózgeristerge qushtarlyqtyń, shynynda da "Jańa ádiletti Qazaqstan" qurýǵa degen tántiliktiń belgisi dep bilý kerek", - deidi depýtat.
Joldaýdaǵy eń mańyzdy másele - parlamenttik reforma.
"30 jylǵa jýyq saiasat arenasynyń bir pushpaǵynda júrgen men ózim bul reforma Qazaqstan Parlamentin naqty saiasi kúshke ainaldyrýǵa, yqpaldy Parlament formýlasyn shynaiy júzege asyrýǵa baǵyttaidy dep sanaimyn. Biz osyndai reformalar arqyly qoǵamnyń saiasi belsendiligin arttyrýǵa jáne ózin-ózi basqarý júiesin damytýǵa baǵyttalǵan bastama dep qabyldaimyz.
Qalai bolǵanda da, kúnderdiń kúninde biz partiialyq sailaý júiesine kelýimiz kerek edi. Biz halyqaralyq qoǵamnyń bir bólshegi retinde álemde qalyptasqan, ázirge basqa formasy tabylmaǵan jalpyǵa ortaq partiialyq sailaý júiesine birtindep kóshýimiz kerek bolǵan. Mysaly, álemdik demokratiianyń altyn besigi sanalatyn AQSh-ta eki partiialyq sailaý júiesi qalyptasqan; Eýroodaq elderiniń barlyǵy derlik partiialyq negizdegi Parlamenti pen Úkimetin sailaidy", - dedi Bápi.
Ol Eýropalyq baspasóz qaýymdastyqtarymen, jekelegen halyqaralyq azamattyq uiymdarmen birshama tyǵyz bailanysy baryn, eki kúnnen beri olar Qazaqstanda bolatyn bolashaq saiasi ózgeristerge tańyrqap, qyzyǵýshylyqpen habarlasyp jatqanyn jasyrmady.
"Bul qyzyǵýshylyqtyń óz jóni bar. Biz Aziia kontinentindegi qoǵamdyq-saiasi damýy tereń stagnatsiiaǵa ushyraǵan memleketterdiń qorshaýyndaǵy elmiz. Avtoritarlyq formadan attap ótýge bet alǵan "araldaǵy" bizdiń ózgeristerge ol memleketter úrke qaraidy. Qazirgi geosaiasi álemniń kúrdeliligi turǵysynda biz osyndai táýekelderge qarsy tura biletindei jalpy qoǵamdyq institýt qura bilýimiz kerek. Ol institýttyń altyn qazyǵy – qoǵamnyń ortaq úni men erik-jigerin jumyldyratyn parlamenttik júie bolýy tiis. Al bul Parlament qazaqstandyq qoǵamnyń bolashaq damý algoritmin qalyptastyratyn saiasi kúshterdiń dińgegi bola alýy kerek" - dedi Bápi.
Degenmen, onyń sózinshe, "bilikti ońdy-soldy synaý daǵdysy súiegine ábden sińip qalǵan, tyrnaq astynan kir izdeý "kásibi" dástúrine ainalǵan jekelegen belsendiler men saiasatker-symaq azamattar osy bastamanyń ózinen kinarat izdep otyr.
Eske salaiyq, buǵan deiin Prezident Qazaqstanda birpalataly parlamentke kóshýdi usyndy.
