Qyzylorda ótip jatqan Ulttyq quryltaıdyń plenarlyq otyrysynda “Ádil sóz” qorynyń jetekshisi Qarlyǵash Jamanqulova jańa Parlament quramyndaǵy áıelder kvotasyn saqtap qalý jóninde usynys bildirdi, dep habarlaıdy Dalanews.kz.
Onyń aıtýynsha, eki palataly parlamentte bir palataly modelge kóshý máselesi sarapshylar arasynda uzaq ýaqyt boıy talqylanyp keledi jáne búginde bul bastama qoǵam tarapynan keń qoldaýǵa ıe bolyp otyr. Osyǵan baılanysty ol partıalyq tizimderdegi áıelder kvotasyn saqtaý qajettigine erekshe nazar aýdardy.
“Sizder áıelderdiń sheshim qabyldaý júıesine belsendi qatysýyn únemi qoldap kelesizder. Zań shyǵarýshy organdardaǵy áıelderdiń turaqty qatysýy qabyldanatyn sheshimderdiń sapasyn arttyryp, ókildi ınstıtýttardyń legıtımdigin kúsheıtedi. Osyny eskere otyryp, áıelderge arnalǵan kvotany 30 paıyz kóleminde saqtaýdy suraımyn”, – dedi Qarlyǵash Jamanqulova.
