Májilis depýtaty Ajar Saǵyndyqova qoqysty qaita óńdeý isin qarjylandyrý úshin elde arnaiy "jasyl" salyq túrin engizýdi usyndy, dep habarlaidy Dalanews.
Depýtattyń sózinshe, ekologiialyq talaptarǵa sai kelmeitin, qorshaǵan ortaǵa ziiandy qaptama qoldanatyn óndirýshiler men tutynýshylarǵa arnaiy tólem engizý – ýaqyt talaby.
"Biz qaldyqtardy basqarý jóninde jeke zań qabyldaý qajet dep sanaimyz. Bul qujat memlekettik organdardyń ókilettiligin, jaýapkershiligin, infraqurylym standarttaryn júielep, memlekettik yntalandyrý tetikterin bekitýi kerek. Sondai-aq, ziiandy qaptamalardy paidalanǵany úshin "jasyl" salyq engizip, odan túsken qarjyny qaldyqtardy óńdeýge baǵyttaý qajet", – deidi Saǵyndyqova.
Ázirge depýtat "jasyl" salyqtyń naqty kimnen alynatynyn naqtylaǵan joq. Degenmen halyqaralyq tájiribege súiensek, ádette eki túrli nusqa bar:
- Óndirýshiler men importtaýshylar – ekologiialyq talapqa sai emes qaptama shyǵarǵan nemese importtaǵan kompaniialar bul salyqty tóleýi múmkin. Mundai jaǵdaida jaýapkershilik tutynýshyǵa emes, bizneske artylady.
- Tutynýshylar – bul jaǵdaida ekologiialyq ziiandy qaptamanyń baǵasyna qosymsha qun salyǵy qosylyp, salyqtyń salmaǵy sońǵy tutynýshyǵa túsedi.
Depýtattar bul eki tásildiń tiimdiligi men kemshilikterin jumys toby aiasynda jan-jaqty talqylap, naqty usynystar ázirlemek. Al, ázirge "jasyl" salyqty kim tóleitini týraly naqty sheshim qabyldanǵan joq. Tolyq usynystar men zań jobasynyń egjei-tegjeii depýtattardyń arnaiy otyrystarynda qarastyrylǵannan keiin ǵana Májilistiń resmi qaraýyna usynylmaq.
