Adamnyń qiialynda shek joq qoi. Bireý kósheden aqsha toly chemodan taýyp alǵysy kelse, endi bireý: «Shirkin, ailyǵyma bir-eki júz myń qosylsa ǵoi, búkil máselem sheshiler edi» dep armandaidy. Biraq, qyzyq bolǵanda, tabys ósýin óskenimen, problema sol kúii qala beredi eken. Eger kóbeiip ketpese. Nege qalta tesile beredi? Onyń qupiiasyn Siril Parkinson 1955 jyly ashyp qoiypty, dep jazady "Qarjylyq saýat" sarapshylary.
Parkinsonnyń ekinshi zańy bylai deidi: «Shyǵyn tabysyńa qarai óse beredi».
Iaǵni, qansha tapsań - sonsha jumsaisyń. Aqshań kóbeigen saiyn tábetiń ashylyp, «hotelkalaryń» da kóbeie beredi.
200 myń tapqan adam - soǵan ómir súredi, 1 million tapsa - 1 millionǵa ómir súredi. Óitkeni adamnyń tabysy ósken saiyn onyń «qajettilikteri» de «ákel-ákel» dep qylǵytyp juta beredi eken.
Aqsha men midyń bailanysy
Aqsha miǵa tez signal beretin kórinedi. Aqsha kóbeie me, sol kezde adamnyń miy da jańa «deńgeidi» qalap turady deidi. Mysaly, buryn qalta kóteretin qarapaiym kofe iship júrseńiz, endi Starbucks-ke aýysasyz. Buryn avtobýspen júrgen adam biznes-taksige otyra bastaidy. Buryn kiimdi «skidkamen» alsańyz, endi brendterdi jaǵalaisyz. Solai kete beredi.
Psihologiiada ony «Gedonistik beiimdelý» (Hedonic Adaptation) dep ataidy. «Adam jaqsyǵa tez úirenedi» degenniń ǵylymi ataýy - osy. Iaǵni biz janǵa jaily jańa deńgeige tez úirenemiz de, ony «qalypty jaǵdai» kóremiz. Sońynda tabys 5 ese ósse de, qalta baiaǵydai bos qalady.
Ómirden qandai mysal bar?
Statistika óte qatal: lotereia jeńimpazdary men milliondaǵan dollar gonorar alatyn juldyzdardyń kóbi bankrot bolatyn kórinedi. Sebebi olar óz-ózine esep bere almaǵan. Tabys tabýyn tabady, biraq shyǵynyna ie bola almaidy.
Aty ańyzǵa ainalǵan Maik Taisonnyń mysalyn alaiyq. Ol óziniń kásibi mansabynda 400-500 million dollar taza tabys tapqan. Biraq 2003 jyly bankrot bolyp qalady. Nege? Óitkeni aqshasyn ońdy-soldy shashty. Tamyr-tanystyń bárine júz myńdaǵan dollarǵa saǵat, kólik degendi syilai berdi. Úiine altyn jalatylǵan vanna ornatyp, 3 jolbarys asyraǵan (satyp alǵan). Sondai birdeńeleri bar.
Túk aqsha ákelmeitin, tek shyǵyndy kóbeitetin nársege aqshany shasha bergen, shasha bergen. Qysqasy, Taison Parkinson zańynyń qurbany bolǵan ǵoi.
Parkinson zańyn qalai jeńemiz?
Tabystan ósim bar ma? Kemi jartysyn saqta! Iaǵni, jalaqy 100 myń teńgege ósse, sonyń 50 myńyn «kórmegendei» bolýyń kerek. Birden depozitke nemese tabys ákeletin investitsiiaǵa baǵyttaýǵa bolady. Qalǵan 50 myńyn kerek-jaraqqa jumsaisyń.
Shyǵyndy da qolmen tejep úirený kerek eken. Tabys ósken jaǵdaida da, ómir súrý deńgeiin birden kótermeý kerek. Ol kezde ózińdi joǵaltyp alýyń múmkin.
«48 saǵat» erejesi de bar. Tabysy kóbeigen adam birden qymbat dúnie satyp alýǵa asyǵyp jatady. Óitkeni múmkindigim bar dep oilaidy. Sol sezimdi ustaý úshin kóp aqsha jumsaityn saýdany 48 saǵatqa shegerip qoiǵan durys deidi. Sol ýaqytta adamnyń emotsiiasy basylady. Tipti kei jaǵdaida alǵyń kelgen zat kerek emes bolyp qalýy múmkin.
Adam eger Parkinson zańyna erik beretin bolsa, milliarder bolsa da aqshasynyń bereketin kóre almaidy deidi. Sondyqtan, aqshaǵa ie bolý úshin de belgili bir tártipke baǵynýǵa týra keledi. Sen ony qala-qalama, tártipsiz tiyn quralmaitynyn túsiný kerek. Óz-ózińdi tejeý, esep berý, oilaný, emotsiiany basqarý - bári kerek dúnie eken.
Al, endi aityńyz, aqsha jumsaýǵa siz qalaisyz?
