Shymkent qalasynyń turǵyny para berýge oqtalǵany úshin 195 mln teńge aiyppul arqalady, dep habarlaidy Dalanews.kz.
Shymkent qalasynyń qylmystyq ister jónindegi aýdanaralyq sotynda sottalýshy T.-ǵa qatysty qylmystyq is qaraldy. Oǵan Qylmystyq kodekstiń 24-baby 3-bóligi, 367-babynyń 2-bóligi («Laýazymdy adamǵa aitarlyqtai mólsherde para berýge oqtalý») boiynsha aiyp taǵylǵan, - delingen Shymkent sottarynyń Telegram-da jariialaǵan habarlamasynda.
Sot málimetinshe, azamat seriktestik direktory qyzmetin atqaryp júrip, Ekonomikalyq tergep-tekserý departamentiniń ózine spirt óndirý, saqtaý jáne ótkizýdegi zańsyz áreketine qatysty qylmystyq is qozǵaǵanyn bilgen. Ol qylmystyq jaýapkershilikke tartylmaý maqsatynda mamyr aiynda departamenttiń 1-basqarmasy basshysyna 20 myń AQSh dollary (resmi baǵammen 8 788 000 teńge) jáne 1 mln teńge para bermek bolǵan.
Prokýror sottalýshyǵa aiyppul jazasyn taǵaiyndaýdy suraǵan.
Jaza taǵaiyndaý barysynda sottalýshynyń qylmystyq jaýapkershiligin jeńildetetin jáne aýyrlatatyn mán-jailar anyqtalmady. T. Qylmystyq kodekstiń 24-baby 3-bóligi, 367-baby 2-bóligi boiynsha kináli dep tanylyp, oǵan memlekettik qyzmette jáne memlekettik uiymdarda laýazymdardy atqarý quqyǵynan ómir boiyna aiyra otyryp, paranyń 20 eselengen mólsherinde 195 641 856 teńge aiyppul jazasy taǵaiyndaldy, – delingen sot habarlamasynda.
Úkim zańdy kúshine engen joq.
