شىمكەنت قالاسىنىڭ تۇرعىنى پارا بەرۋگە وقتالعانى ءۇشىن 195 ملن تەڭگە ايىپپۇل ارقالادى، دەپ حابارلايدى Dalanews.kz.

شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا سوتتالۋشى ت.-عا قاتىستى قىلمىستىق ءىس قارالدى. وعان قىلمىستىق كودەكستىڭ 24-بابى 3-بولىگى، 367-بابىنىڭ 2-بولىگى («لاۋازىمدى ادامعا ايتارلىقتاي مولشەردە پارا بەرۋگە وقتالۋ») بويىنشا ايىپ تاعىلعان، - دەلىنگەن شىمكەنت سوتتارىنىڭ Telegram-دا جاريالاعان حابارلاماسىندا.

سوت مالىمەتىنشە، ازامات سەرىكتەستىك ديرەكتورى قىزمەتىن اتقارىپ ءجۇرىپ، ەكونوميكالىق تەرگەپ-تەكسەرۋ دەپارتامەنتىنىڭ وزىنە سپيرت ءوندىرۋ، ساقتاۋ جانە وتكىزۋدەگى زاڭسىز ارەكەتىنە قاتىستى قىلمىستىق ءىس قوزعاعانىن بىلگەن. ول قىلمىستىق جاۋاپكەرشىلىككە تارتىلماۋ ماقساتىندا مامىر ايىندا دەپارتامەنتتىڭ 1-باسقارماسى باسشىسىنا 20 مىڭ اقش دوللارى (رەسمي باعاممەن 8 788 000 تەڭگە) جانە 1 ملن تەڭگە پارا بەرمەك بولعان.

پروكۋرور سوتتالۋشىعا ايىپپۇل جازاسىن تاعايىنداۋدى سۇراعان.

جازا تاعايىنداۋ بارىسىندا سوتتالۋشىنىڭ قىلمىستىق جاۋاپكەرشىلىگىن جەڭىلدەتەتىن جانە اۋىرلاتاتىن ءمان-جايلار انىقتالمادى. ت. قىلمىستىق كودەكستىڭ 24-بابى 3-بولىگى، 367-بابى 2-بولىگى بويىنشا كىنالى دەپ تانىلىپ، وعان مەملەكەتتىك قىزمەتتە جانە مەملەكەتتىك ۇيىمداردا لاۋازىمداردى اتقارۋ قۇقىعىنان ءومىر بويىنا ايىرا وتىرىپ، پارانىڭ 20 ەسەلەنگەن مولشەرىندە 195 641 856 تەڭگە ايىپپۇل جازاسى تاعايىندالدى، – دەلىنگەن سوت حابارلاماسىندا.

ۇكىم زاڭدى كۇشىنە ەنگەن جوق.