Bul aqparatty Ábishevtiń qorǵaýshysy Erlan Makenov rastady.
“Búgin appelásıalyq sanksıa Baıqońyr sotynyń qaýlysynyń kúshin joıdy. Islam Ábishovtyń ótinishin qanaǵattandyrdy. Ol shartty túrde bosatyldy. Bir jyl alty aı boıy, aıyna eki ret quzyrly organdarǵa baryp belgilenip otyratyn bolady”, – deıdi Makenov.
Sonymen qatar, qorǵaýshy Islam Ábishevtiń zańdy túrde bosatylǵanyn málimdedi. Onyń sózinshe, shartty túrde bostandyqqa shyǵýǵa Ábishevtiń 63 jastan asqandyǵy da áser etken.
“2020 jyly 29 jeltoqsanda shyqqan zańnyń 72-babyna shartty túrde bostandyq berýdi alyp tastaý týraly bólik qosyldy. Qazirgi tańda bizde bul taqyrypqa qatysty talas-tartys bolyp jatyr. Alaıda bul baptyń 8 tarmaǵy boıynsha aýyr jáne asa aýyr sybaılas jemqorlyq qylmysy úshin sottalǵan 63 jastan asqan azamattardy shartty túrde jazadan bostaý qarastyrylǵan. Sot Islam Ábishevtiń jasy 65-te ekenin nazarǵa ala otyryp, ótinishimizdi qanaǵattandyrdy”, – deıdi Makenov.
Oǵan qosa, Ábishevtiń bosap shyqqany týraly advokat Abzal Quspan da jazba qaldyryp, súıinshi surady. Oǵan qosa, Abzal Quspan Ábishovtiń qazirgi tańda aýrýhanada jatqanyn aıtty.
“Bul merziminen buryn shartty túrde bostandyqqa shyǵarý boıynsha jasaǵan tórtinshi áreketimiz edi. Apelásıalyq alqanyń qaýlysy jarıalanǵan sátten bastap kúshine enedi. Iaǵnı Islam Ábishev qazirgi sátten bastap resmı túrde bostandyqqa shyqty. 65 jastaǵy Islam Ábishev 31 mamyr kúni kolonıadan aýyr halde aýrýhanaǵa jetkizildi. Ol áli de aýrýhanada, oǵan pnevmonıa degen dıagnoz qoıyldy. Islam Ábishevke telefon soǵyp habarlastym. Ol “emdeý kýrsy taǵaıyndalǵandyqtan, aýrýhanada jata turamyn” dedi. Qazir em alyp jatyr”, – deıdi Abzal Quspan.
Eske salsaq, sý resýrstary komıtetiniń burynǵy tóraǵasy Islam Ábishev bes jylǵa túrmege jabylǵan. Sondaı-aq, eks-sheneýnikpen birge onyń sybaılasy – dúnıejúzilik qazaq kúresi federasıasynyń burynǵy vıse-prezıdenti de tórt jylǵa abaqtyǵa qamaldy
