Aýǵanstan men Pákistan arasyndaǵy jaǵdai qaita ýshyǵyp, taraptar bir-birine soqqy jasady. Pákistan biliginiń málimdeýinshe, eldiń qarýly kúshteri beisenbi kúni aýǵandyq "Taliban" qozǵalysy jasaǵan shabýylǵa jaýap qaitarǵan, dep habarlaidy Dalanews.kz.
Pákistannyń Aqparat jáne radiohabar taratý ministrligi bul áreketti "Aýǵanstandaǵy Taliban rejiminiń arandatýsyz qadamyna berilgen jedel ári tiimdi jaýap" dep baǵalady. Resmi Islamabad óz aýmaqtyq tutastyǵy men azamattarynyń qaýipsizdigin qorǵaý úshin barlyq qajetti sharany qabyldaitynyn málimdedi.
Pákistan tarapynyń dereginshe, olardyń áskeri Chitral, Haiber, Mohmand, Kýrram jáne Badjaýr aýdandarynda talibterge qarsy soqqylardy jalǵastyryp jatyr. Islamabad 72 aýǵan talibynyń joiylǵanyn, taǵy kóptegen adamnyń jaralanǵanyn jáne birneshe áskeri nysan men qarý-jaraqtyń talqandalǵanyn habarlady.
Alaida Aýǵanstan bul málimetterdi rastamady. Kabýldyń málimdeýinshe, qaqtyǵys saldarynan segiz aýǵan sarbazy qaza taýyp, 11-i jaralanǵan. Sonymen birge Pákistan kúshteri Nangarhardaǵy bosqyndar lagerine soqqy jasaǵan kezde 13 beibit turǵyn, onyń ishinde áielder men balalar jaraqat alǵany aityldy.
Buǵan deiin beisenbi keshinde aýǵan áskeri Pákistan pozitsiialaryna qarsy shabýyl bastaǵan. Kabýl bul operatsiiany demalys kúnderi Pákistan aýmaǵynan Aýǵanstandaǵy nysandarǵa jasalǵan áýe soqqylaryna jaýap retinde túsindirdi. Shabýyl saldarynan keminde 18 adam qaza tapqan edi. Aýǵanstan qorǵanys ministrligi jaýap soqqylary shekara boiyndaǵy alty provintsiiada júrgizilgenin habarlady.
Pákistan demalys kúnderi Aýǵanstan aýmaǵyna jasaǵan soqqylaryn "Pákistan Talibany" (Tehrik-e-Taliban Pakistan, TTP) lagerlerine, onyń bólimshelerine jáne "Islam memleketimen" bailanysty toptarǵa qarsy baǵyttalǵanyn málimdegen. Islamabad bul uiymdardy el ishindegi birqatar shabýylǵa jaýapty dep aiyptady.
Keiingi aptalarda Pákistanda birneshe ólimge ákelgen shabýyldar tirkelgen. Bilik olardy Aýǵanstan aýmaǵynda ornalasqan toptardyń "jetekshileri men úilestirýshileriniń nusqaýymen" jasalǵan dep sanaitynyn aitty.
Eske salaiyq, byltyr qazan aiynan beri eki el arasynda turaqsyz bitim saqtalyp kelgen. Alaida jeltoqsan aiynyń basynda da taraptar shekara boiynda qarqyndy atys almasqan bolatyn.
