Áliev Armeniiaǵa úsh ret múmkindik bergenin aitady.
"Pashinian biz bergen múmkindikti paidalanbady. Áskerimizdiń urys alańyndaǵy is-qimyly utymdy boldy. Jaý jasaǵy keri sheginip, áskeri tehnikasy otqa orandy. Bul basymdyqty báseńdetpei, shabýyldy údete túsýge bolar edi. Taýly Qarabaq konfliktisin qarý qoldanbai sheshýdi suraǵan halyqaralyq kúshterdiń sózine qulaq asyp, bir emes, úsh márte atys-shabysty toqtattyq", – dedi Áliev.
Alaida armian taraby eldi-mekenderdi bombylaýdy toqtatpaǵan.
"Armeniia atys-shabysty toqtatý týraly uiǵarymdy qatarynan úsh ret buzdy. Aldymen Giandjeni ballistikalyq zymyrandarmen atqylady. Kelesi kelisimdi de arada úsh-tórt minýt ótkesin umytyp ketti.
Úshinshi ret "Quiyn" zymyranyn Bardaǵa baǵyttyp, sonyń saldarynan 21 adam ajal qushty, 70 adam aýyr jaraqat aldy.
Giandjany bombylaǵan Pashiiannyń saýatsyz sheshimi kesirinen 30 beibit turǵyn úiindiniń astynda qaldy", – dedi Áliev.
Ázirbaijan prezidenti óz sózinde armian fashizmin "besiginde tunshyqtyrý" qajettigin aityp, ázirbaijan halqyn aiyptaǵandarǵa jaýap qatty. Onyń atap ótkenindei Ázirbaijan áskeri atajurtyn basqynshylardan azat etýde.
"Taýly Qarabaq konfliktisine túbegeili núkte qoiar kez keldi. Sonda ǵana ádilet pen beibitshilik ornaidy. Áldekimder aityp júrgendei armian jerine entelei enetin oiymyz joq. Munyń bári arandatý. Tarihi turǵydan ázirbaijan halqyna tiesili jerdi keri qaitarmai janymyz jái tappaidy, kóńilimiz tynyshtalmaidy", – dedi Áliev.
Tikelei efirde kórsetilgen is-sharaǵa Túrkitildes memleketter yntymaqtastyǵy keńesiniń Bas hatshysy Baǵdat Ámireev, Túrkiia saýda palatasy jáne saýda-sattyq birjasynyń prezidenti Mustafa Rifat, Ózbekstannyń saýda jáne ónerkásip palatasynyń tóraǵasy Adham Ikrámov jáne Qyrǵyzstan saýda jáne óndiris palatasynyń prezidenti Marat Shárshekeev qatysty.
...
Taýly Qarabaq halyqaralyq deńgeide Ázerbaijannyń jeri sanalady. Biraq ol 1990-jyldardan beri etnikalyq armiandardyń baqylaýynda. Sovet Odaǵy ydyraǵanda Erevannyń qoldaýyna ie armian separatisteri Ázerbaijannan bólinip shyǵatynyn málimdep, arty Ázerbaijan men Armeniia arasyndaǵy soǵysqa ulasty. Alty jylǵa sozylǵan soǵys 1994 jylǵy kelisimmen toqtady. Biraq beibitshilik tolyq ornaǵan joq, ara-arasynda qaqtyǵystar bolyp turdy. Sol ýaqyttan beri Taýly Qarabaq etnikalyq armiandardyń qolynda. Soǵys saldarynan júzdegen myń ázerbaijan bosqynǵa ainaldy.
