Ózbekstanda Parlamentaralyq Odaq Assambleiasynyń mereitoilyq otyrysy ótti. Forýmǵa qatysýshylar parlamentterdiń áleýmettik damý men áleýmettik ádildikti qamtamasyz etýdegi rólin talqylady. Qazaqstan Parlamentiniń delegatsiiasyn Májilis tóraǵasy Erlan Qoshanov bastap bardy, dep habarlaidy Dalanews.kz.
Májilis spikeri baiandamasynda atap ótkendei, forýmnyń ǵasyrlar boiy halyqtar men mádenietterdi toǵystyrǵan Uly Jibek jolynyń boiynda uiymdastyrylýynyń simvoldyq máni zor. Ol Parlamentaralyq Odaqtyń 150-shi Assambleiasy taqyrybynyń ózektiligine toqtala otyryp, jańa jahandyq syn-qaterler jaǵdaiynda BUU Bas hatshysy Antoniý Gýterrish usynǵan jańa qoǵamdyq shart ideiasynyń mańyzdylyǵy arta túskenine mán berdi. Erlan Qoshanov Qazaqstan onyń ideiasynyń ádilettilik pen yntymaqqa negizdelgen basty qaǵidattaryn tolyq qoldaitynyn, al parlamentter onyń júzege asyrylýynda halyq atynan ókildik etetin institýt retinde basty ról atqara alady dep esepteidi.
«Ádilettilik Prezidentimiz Qasym-Jomart Toqaevtyń saiasi baǵdarynyń ideialyq negizi sanalady. Onyń kóshbasshylyǵymen Ádiletti Qazaqstandy qurýǵa baǵyttalǵan júieli saiasi jáne ekonomikalyq reformalar iske asyrylýda. Bul qoǵamnyń saiasatqa aralasý múmkindigin keńeitip, áleýmettik teńsizdikti azaitty. Inkliýziiany damytýǵa, densaýlyq saqtaý men bilimniń qoljetimdi bolýyna, ulttyq bailyqtyń ádiletti bólinýine airyqsha nazar aýdarylýda. Munyń bári Parlament qabyldap jatqan zańdarda kórinis taýyp otyr», – dedi Erlan Qoshanov.
Májilis tóraǵasy sońǵy otyz jyl ishinde qarjy sektorynyń naqty óndiristi yǵystyryp kele jatqanyn kóptegen halyqaralyq sarapshylar atap kórsetip jatqanyna toqtaldy. Bul memlekettiń áleýmettik róliniń tómendeýine jáne jumysshylardyń quqyqtarynyń saqtalýyna keri áserin tigizdi. Qazaqstanda, kerisinshe, barlyq azamatqa laiyqty eńbek jaǵdaiyn jasap, kásibi ósýdiń teń múmkindikterin qamtamasyz etýge erekshe kóńil bólinedi. Memleket basshysy 2025 jyldy Jumysshy mamandyqtar jyly dep jariialady.
Qazaqstan ishki reformalardy belsendi halyqaralyq yntymaqtastyqpen ushtastyra otyryp sátti júzege asyryp keledi. Bizdiń el Ortalyq Aziia men Aýǵanstan elderi úshin Ornyqty damý maqsattary boiynsha BUU-nyń óńirlik ortalyǵyn Almaty qalasynda qurý bastamasyn usynǵan bolatyn. Osyǵan orai Májilis tóraǵasy BUU Bas Assambleiasynyń tiisti qararyn biraýyzdan maquldaǵany úshin atalǵan uiymǵa múshe barlyq elge shynaiy rizashylyǵyn bildirdi.
Ekinshi kúni álemniń joǵary parlamenttik delegatsiialaryna Ózbekstan Prezidenti Shavkat Mirziioev quttyqtaý sózin arnady. Ol beibitshilik, demokratiia jáne turaqty damý ideialaryn álem boiynsha ilgeriletýge qosqan qomaqty úlesi úshin Parlamentaralyq Odaqqa alǵys bildirdi.
Ózbekstan basshysy Ortalyq Aziia elderi parlamentteriniń spikerlerin qabyldap, Assambleiaǵa qatysqandary úshin alǵys aitty jáne óńirdegi parlamentter arasyndaǵy ózara is-qimyldy kúsheitý jónindegi basym baǵyttardy talqylady.
Forým aiasynda Erlan Qoshanov sheteldik áriptesterimen birqatar eki jaqty kezdesý ótkizdi.
Ol Ózbekstan Respýblikasynyń Olii Májilisi Zań shyǵarý palatasynyń spikeri Nýriddin Ismoilovpen, Bahrein Koroldiginiń Ókilder keńesiniń spikeri Ahmed Almýsalammen, Marokko Koroldigi Parlamentiniń Keńesshiler palatasynyń tóraǵasy Mohammed Ýld Errashidpen, Úndistan Parlamentiniń Halyq palatasynyń tóraǵasy Om Birlamen parlamentaralyq yntymaqtastyqty arttyrý máselelerin talqylady. Taraptar parlamentaralyq diplomatiia aiasyndaǵy ózara is-áreketti nyǵaitý, zańnama salasynda tájiribe almasý joldaryn ortaǵa saldy.
Sondai-aq Májilis spikeri forým aiasynda Resei, Ázerbaijan, Vetnam, Grýziia, Túrkiia jáne Qyrǵyzstan parlamentteriniń tóraǵalarymen yntymaqtastyqty tereńdetý máseleleri boiynsha pikir almasty.
Tashkentte ótken is-sharaǵa álemniń shamamen 140-tan astam elinen delegattar qatysty. Qazaqstan depýtattary negizgi sessiiadan bólek, beibitshilik jáne qaýipsizdik, turaqty damý máseleleri boiynsha komitet otyrystaryna, áielder parlamentariileriniń forýmyna, «Eýraziia» geosaiasi tobynyń otyrysyna qatysty.
Qazaqstan Parlamenti Májilisiniń depýtaty Aigúl Kuspan basqaratyn Beibitshilik jáne halyqaralyq qaýipsizdik máseleleri jónindegi turaqty komitettiń otyrysynda «Palestinada eki memlekettiniń qatar ómir súrýi týraly sheshimdi ilgeriletýdegi parlamentterdiń róli» atty qarar jobasy qaraldy.
Aita keteiik, Parlamentaralyq Odaq - 1889 jyly qurylǵan eń iri halyqaralyq parlamenttik uiym. Oǵan 180 eldiń parlamentteri kiredi. Qazaqstan 1993 jyldan bastap Parlamentaralyq Odaq Assambleiasyna múshe.
Parlamentaralyq Odaq Assambleiasy parlamenttik diplomatiiaǵa yqpal etedi jáne parlamentter men parlamentshilerge búkil álemde beibit saiasatty, demokratiiany jáne turaqty damýdy ilgeriletý ókilettikterin beredi.
