2026 jyldyń sáýir aiynda Qazaqstan áýejailaryndaǵy jolaýshylar aǵyny ósimin saqtap qaldy. Alaida ósim qarqyny boiynsha Ózbekstan óńirdegi kóshbasshy atanyp, Qazaqstandy artta qaldyrdy, dep habarlaidy dalanews.kz.
Óńir elderi qandai nátije kórsetti?
Halyqaralyq áýejailar keńesiniń Eýropadaǵy bólimshesi – Airports Council International Europe (ACI EUROPE) jariialaǵan málimetke sáikes, 2026 jyldyń sáýirinde Ózbekstan áýejailaryndaǵy jolaýshylar aǵyny 2025 jyldyń sáikes kezeńimen salystyrǵanda 9,1%-ǵa artqan.
Osylaisha Ózbekstan Ortalyq Aziia men Kavkaz óńirindegi eń joǵary ósimdi tirkedi. Al Qazaqstanda bul kórsetkish 1,6% boldy. Oń dinamika Armeniia áýejailarynda da baiqaldy. Munda jolaýshylar aǵyny 8,7%-ǵa ósken.
Al Ázerbaijan men Grýziia áýejailarynda kerisinshe tómendeý tirkeldi. Ázerbaijanda kórsetkish 12,9%-ǵa, Grýziiada 16,3%-ǵa azaiǵan.
Basqa elderdegi jaǵdai qandai?
Jolaýshylar aǵynynyń eń joǵary ósimi Slovakiia (125,2%), Soltústik Makedoniia (30,6%), Albaniia (25,3%) jáne Moldova (24,6%) elderinde baiqalǵan. Al eń úlken tómendeý Izrail (-73,4%), Resei (-18%), Grýziia (-16,3%) jáne Kipr (-16,1%) elderinde tirkelgen.
ACI EUROPE málimdemesi
ACI EUROPE sarapshylary keibir elderdegi jolaýshylar aǵynynyń tómendeýin Taiaý Shyǵystaǵy áskeri qaqtyǵystardyń saldarymen bailanystyrdy. Uiymnyń málimetinshe, aqpan aiynyń sońynda bastalǵan AQSh pen Izraildiń Tegeranǵa qarsy áskeri operatsiiasynan keiin óńirdegi áýe qatynasyna kedergiler týyndaǵan. Buǵan Iran men Parsy shyǵanaǵyndaǵy birqatar elderdiń áýe keńistigin jabýy sebep bolǵan.
Sarapshylardyń pikirinshe, bul jaǵdai halyqaralyq reisterdiń oryndalýyna áser etip, kei memleketterdegi jolaýshylar aǵynynyń azaiýyna yqpal etken.
