Ózbekstan Ortalyq Aziiada alǵash bolyp Braziliiada shyǵarylatyn C-390 Millennium áskeri-kólik ushaqtaryn qarýlanýyna engizbek, dep habarlaidy Dalanews.kz.
C-390 Millennium ushaǵy 26 tonnaǵa deiin júk tasymaldaýǵa qabiletti, saǵatyna 870 shaqyrymǵa deiin jyldamdyq alady jáne topyraq ushý-qoný jolaqtarynda paidalanýǵa bolady.
Qazirgi tańda Ózbekstan áskeri-áýe kúshteriniń parkinde Ispaniiada shyǵarylǵan C-295 úlgisindegi tórt ushaq bar. Olardyń júk kótergishtigi 9,2 tonna. Alaida mamandardyń pikirinshe, bul ushaqtar jergilikti klimattyq jaǵdaiǵa tolyq beiimdelmegen: uzartylǵan ushý-qoný jolaqtaryn qajet etedi, ári joǵary temperatýrada júk kóterý múmkindigi tómendeidi.
Saraptamalyq pikirlerde Ózbekstannyń dál osy braziliialyq ushaqty tańdaýy daýly sheshim retinde baǵalanyp otyr. Sebebi el 2012 jylǵa deiin álemdegi eń úzdik áskeri-kólik ushaqtarynyń biri sanalatyn Il-76 úlgisin ózi óndirgen.
Salystyrý úshin: anyqtamalyq derekterge sáikes, 60 tonna júk kóteretin Il-76 ushaǵynyń katalojdyq baǵasy shamamen 27 mln dollar, al 26 tonna júkke eseptelgen C-390 Millennium ushaǵynyń baǵasy 50 mln dollar.
