Kólik ministri Marat Qarabaev qyzmetinen bosatylǵannan keiin onyń mindetin vitse-ministr Maqsat Qaliaqparov atqaryp jatyr, dep habarlaidy Dalanews.kz.
Búgin premer-ministr Oljas Bektenovtiń tóraǵalyǵymen kólik salasyndaǵy iri investitsiialyq jobalar boiynsha keńes ótti. Onda Qaýipsizdik keńesiniń otyrysynda Memleket basshysy júktegen tapsyrmalardyń oryndalý barysy qaraldy.
«Keńeste kólik ministriniń mindetin ýaqytsha atqarýshy Maqsat Qaliaqparovtyń, «Qazaqstan temir joly» basqarma tóraǵasy Nurlan Saýranbaevtyń jáne «QazAvtoJol» basqarma tóraǵasy Darhan Imanashevtyń baiandamasy tyńdaldy», – delingen úkimettiń habarlamasynda.
Kólik ministrliginiń saitynda Qaliaqparov 2023 jyldyń 6 qazanynan beri vitse-ministr qyzmetin atqaryp kele jatqany kórsetilgen.
Eske sala keteiik, 8 maýsymda Prezident jarlyǵymen Marat Qarabaev kólik ministri qyzmetinen bosatylǵan edi. Buǵan deiin, 14 mamyrda kólik-logistika salasynyń damýyna qatysty Qaýipsizdik keńesiniń otyrysynda Prezident Qarabaevqa sógis jariialaǵan bolatyn. Qasym-Jomart Toqaev kólik salasyndaǵy jaǵdaidy synǵa alyp, salanyń júieli máseleler men josparlardyń oryndalmaýy saldarynan jańǵyrtylmai otyrǵanyn atap ótken. Sondai-aq, ol shekarada júk ótkizýge qatysty qiyndyqtar, kóptegen ótkizý beketteriniń qanaǵattanarlyqsyz jaǵdaiy jáne iri infraqurylymdyq tranzittik jobalardyń kesteden keshigýi siiaqty problemalarǵa nazar aýdardy.
