– Ulyq Allanyń qalaýymen bizder Ulylar otany atanǵan – Otyrar aýdanynda musylman balasynyń qajetti duǵa-tilekterin bir Alla Taǵaladan ǵana suraityn, pendelik qatelikteri úshin keshirim surap, táýbege keler mekeni záýlim meshittiń ashylý saltanatynyń kýási bolyp otyrmyz. Kúmbezi uzaqtan kóz tartatyn meshitterdi qai turǵydan alsaq ta, ár pendege jaqsy oi men izgilikti amaldardy eske salatyny belgili. Meshitten attap ótýge eshkimniń júregi daýalamaidy. Allanyń qaharynan qoryqqan jan qulshylyq jolynda júrmese de, dúnieden qaitqan arýaqtardyń rýhtaryna «Quran» baǵyshtatyp, sadaqasyn salyp, basyna saýlyq, otbasyna amandyq, el-jurtyna tynyshtyq tileidi, shyn júregimen ezilip, shúkirlik aitady. Endeshe, jańa meshit imandylyqtyń temirqazyǵyna ainalsyn, – dep izgi tilegin jetkizip, meshitke qasietti Quran kitabyn syiǵa berdi.
«Esen ana» meshitin otyrarlyq kásipker Óskenbai Úsenov óz qarjysyna saldyryp, kieli meken halqyna tartý etti. Elbasy Nursultan Nazarbaevtyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasy aiasynda qolǵa alynǵan «Týǵan jerdi túletý – perzenttik paryz!» aktsiiasy aýdannyń áleýmettik áleýetiniń artyp, keskin-kelbetiniń ajarlanýyna joǵary deńgeide úles qosyp jatqany belgili. Osy oraida, dińgegi tamyrly elge tektilikpen mán berip, múmkindigin meilinshe halyq igiligine burǵan aýdanǵa janashyr tarlanboz kásipkerlerge aýdan ákiminiń de aitar alǵysy mol.
– Meshitti salý týraly oi týǵan jerge degen ińkár sezim men ystyq yqylastan týyndady. Rýhaniiatqa tunǵan, shejireli tarihty mekenniń halqy qai kezde de ózindik rýhani biiktigimen úlgi bolýy tiis. Bizdiń el men týǵan jerge degen mahabbatymyz perzenttik paryzymyzben keleshek urpaqqa tárbie bolyp qalanary haq. Rýhani ólkedegi rýhani serpilis, rýhani jaqsylyq, jańalyǵymyz azaimasyn. Babalar qaldyrǵan tarih mirasyn jandandyrýǵa, ajarlandyrýǵa úles qosý barshamyzdyń paryzymyz. Jerlesterimdi týǵan jerdi túletýge atsalysýǵa shaqyramyn, – dedi kásipker Óskenbai Úsenov.
Qaiyrymdylyq sharalarynyń bel ortasynan tabylyp, izgilikti isterge uiytqy bolǵan jomart júrekti azamatqa otyrarlyqtar atynan Jańabai Álseiitov aqboz at mingizse, el qariialary aq batalaryn berdi.
Sharada QR Parlamenti Májilisiniń eks-depýtaty Óstemir Bektóreev pen zeinetker Ábilqasym Qulymbetov jańadan ashylǵan imandylyq ordasy aýyl turǵyndary ǵana emes, ósip kele jatqan jastardyń boiyna imandylyq nuryn quiyp, el-jurtty birlikke, tatýlyqqa uiytsyn degen izgi tilekterin bildirdi.
Jiylǵan jurt meshit namazyn oqyp, babalar rýhyna arnalǵan asqa qatysty.
Otyrar aýdany ákiminiń baspasóz qyzmeti
