– Ulyq Allanyń qalaýymen bizder Ulylar otany atanǵan – Otyrar aýdanynda musylman balasynyń qajetti duǵa-tilekterin bir Alla Taǵaladan ǵana suraıtyn, pendelik qatelikteri úshin keshirim surap, táýbege keler mekeni záýlim meshittiń ashylý saltanatynyń kýási bolyp otyrmyz. Kúmbezi uzaqtan kóz tartatyn meshitterdi qaı turǵydan alsaq ta, ár pendege jaqsy oı men izgilikti amaldardy eske salatyny belgili. Meshitten attap ótýge eshkimniń júregi daýalamaıdy. Allanyń qaharynan qoryqqan jan qulshylyq jolynda júrmese de, dúnıeden qaıtqan arýaqtardyń rýhtaryna «Quran» baǵyshtatyp, sadaqasyn salyp, basyna saýlyq, otbasyna amandyq, el-jurtyna tynyshtyq tileıdi, shyn júregimen ezilip, shúkirlik aıtady. Endeshe, jańa meshit ımandylyqtyń temirqazyǵyna aınalsyn, – dep izgi tilegin jetkizip, meshitke qasıetti Quran kitabyn syıǵa berdi.
«Esen ana» meshitin otyrarlyq kásipker Óskenbaı Úsenov óz qarjysyna saldyryp, kıeli meken halqyna tartý etti. Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasy aıasynda qolǵa alynǵan «Týǵan jerdi túletý – perzenttik paryz!» aksıasy aýdannyń áleýmettik áleýetiniń artyp, keskin-kelbetiniń ajarlanýyna joǵary deńgeıde úles qosyp jatqany belgili. Osy oraıda, dińgegi tamyrly elge tektilikpen mán berip, múmkindigin meılinshe halyq ıgiligine burǵan aýdanǵa janashyr tarlanboz kásipkerlerge aýdan ákiminiń de aıtar alǵysy mol.
– Elbasymyz Nursultan Nazarbaevtyń syndarly saıasatynyń arqasynda táýelsiz elimizdiń aq tańyndaǵy tamasha qýanyshty kúnderdiń kýási bolyp kelemiz. Búginde Ult Kóshbasshysynyń «Bolashaqqa baǵdar: rýhanı jańǵyrý» atty baǵdarlamalyq maqalasy halqymyzdyń rýhanı qundylyqtaryn qaıta túletip, eldiń eńsesin kótergen baǵdarly dańǵyl jolymyzǵa aınaldy. Mine, osy maqalanyń «Týǵan jer» baǵdarlamasy, sondaı-aq, Túrkistan oblysynyń ákimi Janseıit Túımebaevtyń bastamasymen júzege asyp jatqan «Týǵan jerdi túletý – perzenttik paryz!» aıasıasy aıasynda aýdanymyzda aýqymdy ıgi jumystar júzege asyp keledi. Aýdannan túlep ushqan kásipkerler Otyrardyń áleýmettik-ekonomıkalyq, mádenı-rýhanı damýyna ózindik úlesin qosyp, qoltańbalaryn qaldyrýda. Otyrar aýdanynan túlep shyǵyp, elimizdiń ár óńirinde úlken jetistikterge jetip, qyzmet etip kele jatqan el aǵalarynyń qoldaýymen Ashyq sport alańdary, jabyq sport kesheni, 5 aýyl okrýgine múmkindigi shekteýli balalardy qalypty ortaǵa beıimdeý oryndary, UOS ardagerleriniń qurmetine arnalǵan memorıaldyq keshen salynyp, eldiń ıgiligine berilýde. Sonyń biri – aýdanymyzdyń tól perzenti, mesenat Óskenbaı Serikbaıuly saldyrǵan záýlim – «Esen ana» meshiti. Osynaý tarıhı sáttiń kúnderdiń sultany bolǵan qasıetti jumaǵa tuspa-tus kelýi de beker emes. Imandylyq pen izgilikke esigin aıqara ashqan meshit ıgi isterdiń bastamasy bolsyn! Memleketimiz órken jaıyp, elimiz molshylyqqa, al árbir shańyraq baqyt pen shattyqqa kenelsin!",-degen Otyrar aýdanynyń ákimi Erlan Aıtahanov Qazaqstan Musylmandary dinı basqarmasynyń tóraǵasy, bas múftı Serikbaı qajy Satybaldyulyna babtardyń baby - Arystanbabtyń móri beınelengen qolóner buıymy men aýdan tarıhynan syr shertetin úsh tilde daıyndalǵan «Otyrar jádigerleri» kitap-albomyn tartý etti.
– Meshitti salý týraly oı týǵan jerge degen ińkár sezim men ystyq yqylastan týyndady. Rýhanıatqa tunǵan, shejireli tarıhty mekenniń halqy qaı kezde de ózindik rýhanı bıiktigimen úlgi bolýy tıis. Bizdiń el men týǵan jerge degen mahabbatymyz perzenttik paryzymyzben keleshek urpaqqa tárbıe bolyp qalanary haq. Rýhanı ólkedegi rýhanı serpilis, rýhanı jaqsylyq, jańalyǵymyz azaımasyn. Babalar qaldyrǵan tarıh mırasyn jandandyrýǵa, ajarlandyrýǵa úles qosý barshamyzdyń paryzymyz. Jerlesterimdi týǵan jerdi túletýge atsalysýǵa shaqyramyn, – dedi kásipker Óskenbaı Úsenov.
Qaıyrymdylyq sharalarynyń bel ortasynan tabylyp, izgilikti isterge uıytqy bolǵan jomart júrekti azamatqa otyrarlyqtar atynan Jańabaı Álseıitov aqboz at mingizse, el qarıalary aq batalaryn berdi.
Sharada QR Parlamenti Májilisiniń eks-depýtaty Óstemir Bektóreev pen zeınetker Ábilqasym Qulymbetov jańadan ashylǵan ımandylyq ordasy aýyl turǵyndary ǵana emes, ósip kele jatqan jastardyń boıyna ımandylyq nuryn quıyp, el-jurtty birlikke, tatýlyqqa uıytsyn degen izgi tilekterin bildirdi.
Jıylǵan jurt meshit namazyn oqyp, babalar rýhyna arnalǵan asqa qatysty.
Otyrar aýdany ákiminiń baspasóz qyzmeti
