وتىرار اۋدانىنىڭ ورتالىعى ءشاۋىلدىر اۋىلىندا مىڭ ادامعا لايىقتالعان جاڭا مەشىت اشىلدى.  «ەسەن انا» اتاۋى بەرىلگەن ءيسى مۇسىلمان بالاسىنىڭ ورتاق رۋحاني  ورنىن سالتاناتتى تۇردە اشىپ، ەل يگىلىگىنە بەرۋگە  قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى وراز ارنايى قاتىسىپ، لەنتاسىن قيدى.

– ۇلىق اللانىڭ قالاۋىمەن بىزدەر ۇلىلار وتانى اتانعان – وتىرار اۋدانىندا مۇسىلمان بالاسىنىڭ قاجەتتى دۇعا-تىلەكتەرىن ءبىر اللا تاعالادان عانا سۇرايتىن، پەندەلىك قاتەلىكتەرى ءۇشىن كەشىرىم سۇراپ، تاۋبەگە كەلەر مەكەنى ءزاۋلىم مەشىتتىڭ اشىلۋ سالتاناتىنىڭ كۋاسى بولىپ وتىرمىز. كۇمبەزى ۇزاقتان كوز تارتاتىن مەشىتتەردى قاي تۇرعىدان الساق تا، ءار پەندەگە جاقسى وي مەن ىزگىلىكتى امالداردى ەسكە سالاتىنى بەلگىلى. مەشىتتەن اتتاپ وتۋگە ەشكىمنىڭ جۇرەگى داۋالامايدى. اللانىڭ قاھارىنان قورىققان جان قۇلشىلىق جولىندا جۇرمەسە دە، دۇنيەدەن قايتقان ارۋاقتاردىڭ رۋحتارىنا «قۇران» باعىشتاتىپ، ساداقاسىن سالىپ، باسىنا ساۋلىق، وتباسىنا اماندىق، ەل-جۇرتىنا تىنىشتىق تىلەيدى، شىن جۇرەگىمەن ەزىلىپ، شۇكىرلىك ايتادى. ەندەشە، جاڭا مەشىت يماندىلىقتىڭ تەمىرقازىعىنا اينالسىن، – دەپ ىزگى تىلەگىن جەتكىزىپ،  مەشىتكە قاسيەتتى  قۇران كىتابىن سىيعا بەردى.

«ەسەن انا» مەشىتىن وتىرارلىق كاسىپكەر وسكەنباي ۇسەنوۆ ءوز قارجىسىنا سالدىرىپ، كيەلى مەكەن حالقىنا تارتۋ ەتتى. ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ»  ماقالاسىنداعى «تۋعان جەر» باعدارلاماسى اياسىندا قولعا الىنعان «تۋعان جەردى تۇلەتۋ – پەرزەنتتىك پارىز!» اكسياسى اۋداننىڭ الەۋمەتتىك الەۋەتىنىڭ ارتىپ، كەسكىن-كەلبەتىنىڭ اجارلانۋىنا جوعارى دەڭگەيدە ۇلەس قوسىپ جاتقانى بەلگىلى. وسى ورايدا، دىڭگەگى تامىرلى ەلگە تەكتىلىكپەن ءمان بەرىپ، مۇمكىندىگىن مەيلىنشە حالىق يگىلىگىنە بۇرعان اۋدانعا جاناشىر تارلانبوز كاسىپكەرلەرگە اۋدان اكىمىنىڭ دە ايتار العىسى مول.

– ەلباسىمىز نۇرسۇلتان نازاربايەۆتىڭ سىندارلى ساياساتىنىڭ ارقاسىندا تاۋەلسىز ەلىمىزدىڭ اق تاڭىنداعى تاماشا قۋانىشتى كۇندەردىڭ كۋاسى بولىپ كەلەمىز. بۇگىندە ۇلت كوشباسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى حالقىمىزدىڭ رۋحاني قۇندىلىقتارىن قايتا تۇلەتىپ، ەلدىڭ ەڭسەسىن كوتەرگەن باعدارلى داڭعىل جولىمىزعا اينالدى. مىنە، وسى ماقالانىڭ «تۋعان جەر» باعدارلاماسى، سونداي-اق، تۇركىستان وبلىسىنىڭ اكىمى جانسەيىت تۇيمەبايەۆتىڭ باستاماسىمەن جۇزەگە اسىپ جاتقان «تۋعان جەردى تۇلەتۋ – پەرزەنتتىك پارىز!» اياسياسى اياسىندا اۋدانىمىزدا اۋقىمدى يگى جۇمىستار جۇزەگە اسىپ كەلەدى. اۋداننان تۇلەپ ۇشقان كاسىپكەرلەر وتىراردىڭ الەۋمەتتىك-ەكونوميكالىق، مادەني-رۋحاني دامۋىنا وزىندىك ۇلەسىن قوسىپ، قولتاڭبالارىن قالدىرۋدا. وتىرار اۋدانىنان تۇلەپ شىعىپ، ەلىمىزدىڭ ءار وڭىرىندە ۇلكەن جەتىستىكتەرگە جەتىپ، قىزمەت ەتىپ كەلە جاتقان ەل اعالارىنىڭ قولداۋىمەن اشىق سپورت الاڭدارى، جابىق سپورت كەشەنى، 5 اۋىل وكرۋگىنە مۇمكىندىگى شەكتەۋلى بالالاردى قالىپتى ورتاعا بەيىمدەۋ ورىندارى، ۇوس ارداگەرلەرىنىڭ قۇرمەتىنە ارنالعان مەموريالدىق كەشەن سالىنىپ، ەلدىڭ يگىلىگىنە بەرىلۋدە. سونىڭ ءبىرى – اۋدانىمىزدىڭ ءتول پەرزەنتى، مەسەنات وسكەنباي سەرىكباي ۇلى سالدىرعان ءزاۋلىم – «ەسەن انا» مەشىتى. وسىناۋ تاريحي ءساتتىڭ كۇندەردىڭ سۇلتانى بولعان قاسيەتتى جۇماعا تۇسپا-تۇس كەلۋى دە بەكەر ەمەس. يماندىلىق پەن ىزگىلىككە ەسىگىن ايقارا اشقان مەشىت يگى ىستەردىڭ باستاماسى بولسىن! مەملەكەتىمىز وركەن جايىپ، ەلىمىز مولشىلىققا، ال ءاربىر شاڭىراق باقىت پەن شاتتىققا كەنەلسىن!"،-دەگەن وتىرار اۋدانىنىڭ اكىمى ەرلان ايتاحانوۆ  قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى ساتىبالدىۇلىنا بابتاردىڭ بابى - ارىستانبابتىڭ ءمورى بەينەلەنگەن قولونەر بۇيىمى مەن اۋدان تاريحىنان سىر شەرتەتىن ءۇش تىلدە دايىندالعان «وتىرار جادىگەرلەرى»  كىتاپ-البومىن تارتۋ ەتتى.

– مەشىتتى سالۋ تۋرالى وي تۋعان جەرگە دەگەن ىڭكار سەزىم مەن ىستىق ىقىلاستان تۋىندادى. رۋحانياتقا تۇنعان، شەجىرەلى تاريحتى مەكەننىڭ حالقى قاي كەزدە دە وزىندىك رۋحاني بيىكتىگىمەن ۇلگى بولۋى ءتيىس. ءبىزدىڭ ەل مەن تۋعان جەرگە دەگەن ماحابباتىمىز پەرزەنتتىك پارىزىمىزبەن كەلەشەك ۇرپاققا تاربيە بولىپ قالانارى حاق. رۋحاني ولكەدەگى رۋحاني سەرپىلىس، رۋحاني جاقسىلىق، جاڭالىعىمىز ازايماسىن. بابالار قالدىرعان تاريح ميراسىن جانداندىرۋعا، اجارلاندىرۋعا ۇلەس قوسۋ بارشامىزدىڭ پارىزىمىز. جەرلەستەرىمدى تۋعان جەردى تۇلەتۋگە اتسالىسۋعا شاقىرامىن، – دەدى كاسىپكەر وسكەنباي ۇسەنوۆ.

قايىرىمدىلىق شارالارىنىڭ بەل ورتاسىنان تابىلىپ، ىزگىلىكتى ىستەرگە ۇيىتقى بولعان جومارت جۇرەكتى ازاماتقا وتىرارلىقتار اتىنان جاڭاباي السەيىتوۆ اقبوز ات مىنگىزسە، ەل قاريالارى اق باتالارىن بەردى.

شارادا ق ر پارلامەنتى ءماجىلىسىنىڭ ەكس-دەپۋتاتى وستەمىر بەكتورەيەۆ پەن زەينەتكەر ءابىلقاسىم قۇلىمبەتوۆ جاڭادان اشىلعان يماندىلىق ورداسى  اۋىل تۇرعىندارى عانا ەمەس، ءوسىپ كەلە جاتقان جاستاردىڭ بويىنا يماندىلىق نۇرىن قۇيىپ، ەل-جۇرتتى  بىرلىككە، تاتۋلىققا ۇيىتسىن دەگەن ىزگى تىلەكتەرىن ءبىلدىردى.

جيىلعان جۇرت مەشىت نامازىن وقىپ، بابالار رۋحىنا ارنالعان اسقا قاتىستى.

 

وتىرار اۋدانى اكىمىنىڭ باسپا ءسوز قىزمەتى