Qazaq halqynyń tarihynan syr shertetin shyǵarmanyń saltanatty tusaý keser rásimine oblys ákimi, ziialy qaýym ókilderi men turǵyndar qatysty. Jiynda sóz alǵan óńir basshysy filmdi daiyndaýdaǵy maqsatyna toqtaldy.
– Memleket basshysy mádeni qazynalarymyzdy álem jurtshylyǵyna tanystyrýdyń múldem jańa tásilderin oilastyrý kerek. Mádeni ónimderimiz tek kitap túrinde emes, ártúrli mýltimediialyq tásildermen de shyqqany abzal degen bolatyn. Bul tapsyrma óńirimizde tiisti deńgeide atqarylyp keledi. Mine, «Otyrardy qorǵaý» animatsiialyq filmi osynyń dáleli, – dedi Janseiit Qanseiituly.
Óńirdegi týrizm salasyn damytýǵa, Otyrar tóbesiniń mártebesin kóterip, shetel azamattarynyń qyzyǵýshylyǵyn arttyrýǵa, kóneden kele jatqan ańyz-áńgimelerdi nasihattaýǵa, kórermendi patriotizmge baýlýǵa baǵyttalǵan dúnie «2D, 3D» formatynda jasalǵan.
Bul filmde aty ańyzǵa ainalǵan kóne Otyrar qalasynyń turmys-tirshiligi men mádenieti elin súietin eki balanyń bastan keshten hikaialary arqyly sýretteledi. Shyǵarmany tamashalaǵan kórermen álemdegi ekinshi kitaphana atanǵan Otyrar kitaphanasy men Ábý Nasyr Ál-Farabi týraly tolyq maǵlumattarǵa qanyǵady. Sondai-aq, jaýdy kúshpen ǵana emes, aqylmen de jeńýge bolatynyn túsingen balalardyń erligi baiandalady.
Animatsiialyq filmniń rejisseri ári bas sýretshisi – Azamat Ernazarov, stsenarii avtory – Baqytjan Quljabai, mýzykasyn jazǵan – Rýslan Shynyqulov, film direktory – Nýriddin Patteev.
25 minýttyq animatsiialyq filmniń alǵashqy kórsetiliminen keiin, oblys ákimi jobaǵa atsalyqan azamattarǵa rizashylyǵyn bildirip, alǵys hatpen marapattady.
Aita keteiik, bul Elbasymyz N.Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasyn júzege asyrý maqsatynda oblys ákimi J.Túimebaevtyń tapsyrysymen túsirilgen jalǵyz film emes. «SAQ» kinostýdiiasy buǵan deiin «Kúsh atasy – Qajymuqan», «Kieli Qazyǵurt» mýltfilm jáne «Kóne jetigenniń syry» atty 10 seriialy telehikaiasyn daiyndady.
Budan bólek, 2018 jyly Ońtústik Qazaqstan oblysy ákimdiginiń qoldaýymen «Tóle bi» 10 serialy kinohikaiasyn, «Túrkistan», «Oqsyz oqiǵasy», «Ordabasy – birliktiń týy» atty animatsiialyq filmderin túsirý josparlanýda.
https://dalanews.kz/32916
OQO ákiminiń baspasóz qyzmeti
