Otyrardaǵy ortalyq múgedek balalardy qalypty ortaǵa beiimdeidi
Túrkistan oblysy Otyrar aýdanyndaǵy Qoǵam jáne Aqqum eldimekenderinde múmkindigi shekteýli balalarǵa arnaýly áleýmettik kómek kórsetetin Kúndizgi qatynaý bólmeleri ashyldy.
Múgedektigi bar balalardy bolashaqta qoǵamdyq ortada ózin-ózi ustaýǵa, adamdarmen emin-erkin qatynas jasaýǵa, ózin teń dárejede sezinýge úiretý, arnaýly áleýmettik qyzmet sapasyn jaqsartý maqsatynda Elordamyz Astana qalasynyń 20 jyldyq mereili jyly aiasynda iske qosylǵan shaǵyn ortalyqtyń ashylý saltanatyna aýdan ákimi Erlan Aitahanov qatysyp, izgi nietin bildirdi.
– Elbasymyz Nursultan Nazarbaevtyń bastamasymen elimizde múmkindigi shekteýli azamattarǵa qamqorlyq jasaý basty nazarǵa alynǵany belgili. Bul ortalyqty ashýdaǵy maqsat – qyzmet alýshylardyń jeke qajettilikterin eskere otyryp, damý deńgeiin arttyrýǵa, arnaýly áleýmettik qyzmet sapasynyń tiimdiligin eselep, múmkindigi shekteýli balalardy qalypty ortaǵa beiimdeý bolyp tabylady. Elimizdiń barlyq azamatynyń qoǵam úshin erekshe orny bar. Jyl basynan beri aýdan kóleminde dál osyndai birqatar mekemeler iske qosylǵan bolatyn. Búgingi qoldanysqa berilgen mekemede balǵyn balalar em alyp, túrli mamandar baqylaýynda bolýymen qatar ata-analar úshin de tiimdi, – degen aýdan ákimi Erlan Aitahanov balalardyń keshki ýaqytqa deiin qoǵamdyq ortaǵa beiimdelýi men ata-analarǵa jaily jaǵdai jasaýǵa úles qosqan jergilikti kásipkerler men jany jomart, qoly ashyq azamattarǵa shynaiy alǵysyn jetkizdi.
Jyl basynan beri Otyrar aýdanynda múmkindigi shekteýli balalardy kezeń-kezeńimen kúndizgi qatynaý bólmelerine ornalastyrý júzege asyrylýda. Qazirgi tańda Otyrar, Maiaqum, Baltakól aýyl okrýgterinde shaǵyn qatynaý bólmesi ashylyp, qyzmet kórsetilip jatsa, igilikti bastamaǵa taǵy da eki ǵimarat qosyldy.
Shara barysynda aýyl turǵyndary atynan qoǵamdyq Keńes Jumashuly men Aqqum eldimekeninen Qutyshbek Esenǵaraevtar balǵyn balalardyń ómirine bei-jai qaramai, igi istiń basynda júrgen azamattarǵa alǵys sezimin bildirip, aq batalaryn berdi.
