مۇگەدەكتىگى بار بالالاردى بولاشاقتا قوعامدىق ورتادا ءوزىن-وزى ۇستاۋعا، ادامدارمەن ەمىن-ەركىن قاتىناس جاساۋعا، ءوزىن تەڭ دارەجەدە سەزىنۋگە ۇيرەتۋ، ارناۋلى الەۋمەتتىك قىزمەت ساپاسىن جاقسارتۋ ماقساتىندا ەلوردامىز استانا قالاسىنىڭ 20 جىلدىق مەرەيلى جىلى اياسىندا ىسكە قوسىلعان شاعىن ورتالىقتىڭ اشىلۋ سالتاناتىنا اۋدان اكىمى ەرلان ايتاحانوۆ قاتىسىپ، ىزگى نيەتىن ءبىلدىردى.
– ەلباسىمىز نۇرسۇلتان نازاربايەۆتىڭ باستاماسىمەن ەلىمىزدە مۇمكىندىگى شەكتەۋلى ازاماتتارعا قامقورلىق جاساۋ باستى نازارعا الىنعانى بەلگىلى. بۇل ورتالىقتى اشۋداعى ماقسات – قىزمەت الۋشىلاردىڭ جەكە قاجەتتىلىكتەرىن ەسكەرە وتىرىپ، دامۋ دەڭگەيىن ارتتىرۋعا، ارناۋلى الەۋمەتتىك قىزمەت ساپاسىنىڭ تيىمدىلىگىن ەسەلەپ، مۇمكىندىگى شەكتەۋلى بالالاردى قالىپتى ورتاعا بەيىمدەۋ بولىپ تابىلادى. ەلىمىزدىڭ بارلىق ازاماتىنىڭ قوعام ءۇشىن ەرەكشە ورنى بار. جىل باسىنان بەرى اۋدان كولەمىندە ءدال وسىنداي ءبىرقاتار مەكەمەلەر ىسكە قوسىلعان بولاتىن. بۇگىنگى قولدانىسقا بەرىلگەن مەكەمەدە بالعىن بالالار ەم الىپ، ءتۇرلى ماماندار باقىلاۋىندا بولۋىمەن قاتار اتا-انالار ءۇشىن دە ءتيىمدى، – دەگەن اۋدان اكىمى ەرلان ايتاحانوۆ بالالاردىڭ كەشكى ۋاقىتقا دەيىن قوعامدىق ورتاعا بەيىمدەلۋى مەن اتا-انالارعا جايلى جاعداي جاساۋعا ۇلەس قوسقان جەرگىلىكتى كاسىپكەرلەر مەن جانى جومارت، قولى اشىق ازاماتتارعا شىنايى العىسىن جەتكىزدى.
جىل باسىنان بەرى وتىرار اۋدانىندا مۇمكىندىگى شەكتەۋلى بالالاردى كەزەڭ-كەزەڭىمەن كۇندىزگى قاتىناۋ بولمەلەرىنە ورنالاستىرۋ جۇزەگە اسىرىلۋدا. قازىرگى تاڭدا وتىرار، ماياقۇم، بالتاكول اۋىل وكرۋگتەرىندە شاعىن قاتىناۋ بولمەسى اشىلىپ، قىزمەت كورسەتىلىپ جاتسا، يگىلىكتى باستاماعا تاعى دا ەكى عيمارات قوسىلدى.
شارا بارىسىندا اۋىل تۇرعىندارى اتىنان قوعامدىق كەڭەس جۇماش ۇلى مەن اققۇم ەلدىمەكەنىنەن قۇتىشبەك ەسەنعارايەۆتار بالعىن بالالاردىڭ ومىرىنە بەي-جاي قاراماي، يگى ءىستىڭ باسىندا جۇرگەن ازاماتتارعا العىس سەزىمىن ءبىلدىرىپ، اق باتالارىن بەردى.
