Aýdannyń tynys-tirshiligine bei-jai qaramaityn aqyldastar alqasy ákimdiktiń arnaiy usynymen túrli sheshimderdi qabyldaýdan buryn talqylaýǵa da múddeli.
Búgin Qoǵamdyq keńestiń kezekti kóshpeli otyrysy aýdan ortalyǵyna shalǵai ornalasqan Aqqum, Kóksarai, Maiaqum, Baltakól aýyl okrýgi ákimderiniń 2018 jyldyń 9 aiynda atqarǵan jumystary men alda turǵan mindetteri týraly esepterin tyńdaýǵa arnaldy.
Atalǵan aýyldyq okrýgterdiń jumys qarqynynda oń serpilister bar. Aýyl jáne mal sharýashylyǵyn damytý, tabys kólemin ulǵaitý, jumyspen qamtý, salyq túsimin arttyrý máselelerine egjei-tegjeili mán bergen komissiia músheleri aldaǵy josparlar jóninde de oi bólisti.
Máselen, Aqqum aýyl okrýginiń ákimi Serik Álsheri esepti baiandamasynda sharýalardyń sý tapshylyǵyna qaramastan 4301 gektar jerge túrli daqyldar egip, ónim alǵanyn jetkizdi. Aýyldyq okrýgte iri qara jáne qoi sany jyl sanap arta bastasa, mal azyǵyn daiyndaý isi 109,3 paiyzǵa artyǵymen oryndalǵan. Al, halqy eń tyǵyz qonystanǵan Kóksarai aýyl okrýginde mal basynyń barlyq túrinen ósim artyp, «Sybaǵa» — 100 paiyz, «Qulan» — 105 paiyz, «Altyn asyq» 101 paiyzǵa artyǵymen oryndalypty.
«Ótken jylmen salystyrǵanda mal sharýashylyǵymen qosa egis kólemi de 793 gektarǵa ulǵaiyp, «Qudaibergen» kanalyna 2 dana nasos qoiý arqyly 400 gektar sýarmaly jerdi aǵyn sýmen qamtamasyz etýge qol jetkizdik»,-deidi Kóksarai aýyl okrýginiń ákimi Ábdirahmen Máýlenqul.
