Áleýmettik jelide Sherzattyń otbasyna qatysty birqatar daýly aqparat taraýda. Sonyń ishinde qaıǵyly oqıǵa bolar aldyndaǵy vıdeo da bar, dep habarlaıdy Dalanews.kz.
Vıdeodan sýyqty qarýdy tek Sherzattyń ákesiniń qolynan kórýge bolady. Qysqasha aıtqanda, vıdeo mazmuny atyshýly "Nursultannyń bulbuly" telegram arnasynda aıtylǵandaı, atalǵan oqıǵa turmystyq janjaldan shyqqan jáne ony birinshi bolyp qaıtys bolǵan jasóspirimniń ákesi men ózi qozǵaǵan degenge saıady.
Bul jaǵdaılarǵa esh tań qalmaıtynyn aıtqan Sherzattyń ákesi Qazaqstanda ádil sheshim shyǵatynyna kúmánmen qaraıtynyn, sondyqtan Prezıdentten, İshki ister mınıstrinen otbasyn Almaty qalasynan, Almaty oblysynan aman-esen alyp shyǵýǵa qoldaý bildirýdi suraıdy.
"Men aqtalaıyn dep turǵanym joq. Qorqyp ta turǵanym joq. Óıtkeni men eshkimdi óltirgen joqpyn, meniń tarapymnan qan shyqpady. Shyny kerek, qaıǵy-qasiretten sharshadym. Men tek ádil sot bolǵanyn qalaımyn. Kinám bolsa, meni kinálasyn. Baýyrymnyń kinási bolsa, ony da kinálasyn. Biraq, meniń bir talabym - balamdy óltirgen adamdar ádil jazasyn alsyn!", - deıdi ol Tık-tokta Prezıdent myrzaǵa joldaǵan sońǵy úndeý vıdeosynda.
Qaraly áke ózin qaralap jatqanyna bek senimdi.
"Meniń balamnyń jaraqattaryn da jasyrmaqshy boldy. Sondyqtan men eshteńege tań qalmaımyn qazir. Sondyqtan mıtıńi degen nárseniń keregi joq. Meni, meniń otbasymdy qaralaýdyń qajeti joq. Eger meniń balamdy óltirgen adamdardyń ákeleri er-azamat bolsa, meniń aldyma keler edi. Tık-tokqa, ınstagramǵa úlken kisilerdi shyǵaryp qoıyp, úıge áıel adamdardy jiberip qoıyp, qarap otyrmas edi. Sonda mundaı dúrbeleńge barmaıtyn edik. Meniń Prezıdentten, İshki ister mınıstrinen suraıtynym, otbasyma tynyshtyq berýin jáne otbasymdy Almaty qalasynan, Almaty oblysynan aman-esen alyp shyǵyp ketýime qoldaý bildirse".
Sondaı-aq ol sottyń sozylatyny aıdan anyq ekenin aıtady. Qolyndaǵy pyshaqqa da qatysty óz oıyn aıtty.
"Men qorqyp-úrkip turǵanym joq. Olar pyshaqpen keldi, men endi qalam, qaǵaz ustap shyqpaımyn ǵoı ondaıda. Olardan jalbarynyp-jalynyp suradym. Sol arada qoldaryn erkekshe berip ketti. "Boldy" dep. Artynan kelip istep otyrǵan tirlikteri anaý. Men, Sherzat, Nurqanat qana boldy bizden. Biz qan tóksek, jaraıdy, aıyptap, qaralasańyzdar bolady. "Qan tókti bular, qan isher" dep. Men qan tókkenim joq, qan tókpeımin de", - deıdi ol.
Onyń oıynsha, munyń barlyǵy óziniń shyndyqty aıtyp qoıǵanynan bolyp jatyr.
"Talǵar aýdanyndaǵy ROVD-nyń, ákimdiktegi, aýrýhandaǵy bylyqtardyń barlyǵyn aıtyp qoıdym. Endi sol úshin óltiretin bolsańyzdar óltirińder, sottatsańdar sottańdar, atamyn deseńder atyńdar, biraq otbasyma – ata-anam, ini-qaryndastaryma tıispeńder. Meniń kózim jetkeni - Qazaqstanda ádiletti sheshim shyqpaıdy. Tek bir ǵana ótinish, Qazaq elinde eshqandaı qantógis bolmasyn. Prezıdent myrzadan otbasymdy elden aman-esen alyp shyǵýyma múmkindik berse. Muny baýyrlarym, ata-anam kórmesin. Al ózime ne isteımin deseńder, isteı berińder. Sońyna deıin baramyn, zańgerlerime senemin. Óıtkeni anam-ákem dep jylaý bir bólek, botam dep jylaý múlde basqa álem. Bir de bir qazaqtyń qany aqpasyn dep, sabyrǵa kelip, baıyppen bárin aqylǵa keltirip otyrmyn. Aıtatynym osy", - deıdi ol sózin túıindep.
Aıta ketsek, 4 qazanda túnde Talǵarda 16 jastaǵy jasóspirim asa qatygezdikpen óltirildi. Qaıǵyly oqıǵa bolǵan kúni Sherzat Bolat dúkende jumys isteıtin ákesine kómektesken. Sol kúni agressıvti tutynýshy saldarynan tóbeles bastalyp,aqyry qandy oqıǵamen aıaqtalǵan.
Kámeletke tolmaǵan balany óltirý deregi boıynsha Almaty oblysynyń polısıa departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý ızolátoryna qamaýǵa alyndy.
Sonymen qatar, Almaty oblystyq polısıa departamenti bastyǵynyń mindetin atqarýshy Shalqarov tóbelesten keıin qansha qarý tárkilengenin aıtty.
Odan keıin Sherzattyń úıine kúzet qoıyldy.
Kóp uzamaı marqum Sherzattyń úıi órtendi.
