12 sáýirde Gúldala aýylyndaǵy meiramhanalardyń birinde jas jigitke 10-nan astam adamnan turatyn top shabýyl jasaǵan, dep habarlaidy Dalanews.kz.
Aldyn ala málimetterge sáikes, ony birneshe adam qorshap alyp, pyshaqtaǵan. Jigit alǵan jaraqattarynan oqiǵa ornynda kóz jumǵan. Oqiǵa kezinde ondaǵan kýáger bolǵany aitylady.
Politsiia kisi óltirý faktisin rastady. Vedomstvo málimetinshe, 20 jastaǵy kúdikti ustalyp, qamaýǵa alynǵan. Sonymen qatar, buzaqylyq deregi boiynsha taǵy úsh adam ustalyp, ýaqytsha ustaý izoliatoryna qamaldy. Eki kúdiktige qatysty úiqamaq bultartpaý sharasy tańdalǵan. Al kámeletke tolmaǵan kúdiktige qatysty qoǵamnan oqshaýlaýǵa bailanysty emes shara qoldanylǵan.
Barlyq kýáger anyqtalyp, jaýap alynǵan. Qazir qajetti tergeý áreketteri júrgizilip jatyr. Istiń tergelý barysy Almaty oblysynyń Politsiia departamenti erekshe baqylaýynda.
