Qorǵanys ministrligi Otarda tómengi jaq súiegi synǵan merzimdi áskeri qyzmetshi Esbol Qapardyń densaýlyǵyna qatysty jańartylǵan aqparat taratty, dep habarlaidy Dalanews.kz.
Vedomstvonyń habarlaýynsha, sarbazdyń jaǵdaiy birtindep jaqsaryp keledi. Qazirgi ýaqytta ol Almaty qalasyndaǵy Qorǵanys ministrliginiń áskeri-klinikalyq gospitalinde ońaltý kýrsynan ótip jatyr.
Ministrlik málimetinshe, oqiǵa merzimdi áskeri qyzmetshiler arasynda oryn alyp, sonyń saldarynan sarbazdyń tómengi jaq súiegi synǵan. Zardap shekken áskeri qyzmetshi der kezinde aýrýhanaǵa jetkizilip, oǵan barlyq qajetti bilikti meditsinalyq kómek kórsetilgen. Sarbazdyń densaýlyq jaǵdaiy áskeri dárigerlerdiń turaqty baqylaýynda.
Áskeri-klinikalyq gospitaldiń jaqsúiek-bet hirýrgiiasy bólimshesiniń bastyǵy, meditsina qyzmetiniń podpolkovnigi Vladislav Mýsatovtyń aitýynsha, qatardaǵy jaýynger Esbol Qapardyń qazirgi jaǵdaiy jaqsy. Aýrýhanaǵa túsken sátte onyń jaǵdaiy salystyrmaly túrde qanaǵattanarlyq dep baǵalanǵan.
Dárigerdiń sózinshe, sarbazdy emdeý tolyq kólemde júrgizilip jatyr. Psihologiialyq jaǵdaiy turaqty, shainaý jáne aýyz ashý fýnktsiialary qalpyna kele bastady. Jaqyn ýaqytta bekitýshi shinalardy alý josparlanyp otyr. Qazir áskeri qyzmetshi fizioterapiia, dárýmendik terapiia, jalpy nyǵaitýshy em jáne emdik dene shynyqtyrý kýrstarynan ótýde. Aldaǵy ýaqytta giperbariialyq oksigenatsiia seanstaryn ótkizý kózdelgen.
Vladislav Mýsatovtyń málimdeýinshe, shamamen bir ai ishinde sarbaz aýrýhanadan shyǵarylady. Tolyq saýyǵyp ketýi úshin oǵan syrqatyna bailanysty demalys beriledi. Odan keiin ol óz áskeri bóliminde qyzmetin jalǵastyrady.
Aita keteiik, 27 qańtarda atalǵan derek boiynsha Gvardeisk garnizonynyń áskeri politsiiasy qylmystyq is qozǵaǵan. Materialdar sotqa deiingi tergep-tekserýdiń biryńǵai tizilimine engizilgen. Qorǵanys ministrligi oqiǵaǵa qatysy bar barlyq tulǵalardyń, sonyń ishinde jaǵdai týraly joǵary qolbasshylyqqa der kezinde habarlamaǵan jáne meditsinalyq kómekti uiymdastyrýda olqylyqtarǵa jol bergen áskeri bólimniń laýazymdy tulǵalarynyń áreketterine jan-jaqty quqyqtyq baǵa beriletinin málimdedi.
