قورعانىس مينيسترلىگى وتاردا تومەنگى جاق سۇيەگى سىنعان مەرزىمدى اسكەري قىزمەتشى ەسبول قاپاردىڭ دەنساۋلىعىنا قاتىستى جاڭارتىلعان اقپارات تاراتتى، دەپ حابارلايدى Dalanews.kz.
ۆەدومستۆونىڭ حابارلاۋىنشا، ساربازدىڭ جاعدايى بىرتىندەپ جاقسارىپ كەلەدى. قازىرگى ۋاقىتتا ول الماتى قالاسىنداعى قورعانىس مينيسترلىگىنىڭ اسكەري-كلينيكالىق گوسپيتالىندە وڭالتۋ كۋرسىنان ءوتىپ جاتىر.
مينيسترلىك مالىمەتىنشە، وقيعا مەرزىمدى اسكەري قىزمەتشىلەر اراسىندا ورىن الىپ، سونىڭ سالدارىنان ساربازدىڭ تومەنگى جاق سۇيەگى سىنعان. زارداپ شەككەن اسكەري قىزمەتشى دەر كەزىندە اۋرۋحاناعا جەتكىزىلىپ، وعان بارلىق قاجەتتى بىلىكتى مەديسينالىق كومەك كورسەتىلگەن. ساربازدىڭ دەنساۋلىق جاعدايى اسكەري دارىگەرلەردىڭ تۇراقتى باقىلاۋىندا.
اسكەري-كلينيكالىق گوسپيتالدىڭ جاقسۇيەك-بەت حيرۋرگياسى بولىمشەسىنىڭ باستىعى، مەديسينا قىزمەتىنىڭ پودپولكوۆنيگى ۆلاديسلاۆ مۋساتوۆتىڭ ايتۋىنشا، قاتارداعى جاۋىنگەر ەسبول قاپاردىڭ قازىرگى جاعدايى جاقسى. اۋرۋحاناعا تۇسكەن ساتتە ونىڭ جاعدايى سالىستىرمالى تۇردە قاناعاتتانارلىق دەپ باعالانعان.
دارىگەردىڭ سوزىنشە، ساربازدى ەمدەۋ تولىق كولەمدە جۇرگىزىلىپ جاتىر. پسيحولوگيالىق جاعدايى تۇراقتى، شايناۋ جانە اۋىز اشۋ فۋنكسيالارى قالپىنا كەلە باستادى. جاقىن ۋاقىتتا بەكىتۋشى شينالاردى الۋ جوسپارلانىپ وتىر. ءقازىر اسكەري قىزمەتشى فيزيوتەراپيا، دارۋمەندىك تەراپيا، جالپى نىعايتۋشى ەم جانە ەمدىك دەنە شىنىقتىرۋ كۋرستارىنان وتۋدە. الداعى ۋاقىتتا گيپەرباريالىق وكسيگەناسيا سەانستارىن وتكىزۋ كوزدەلگەن.
ۆلاديسلاۆ مۋساتوۆتىڭ مالىمدەۋىنشە، شامامەن ءبىر اي ىشىندە سارباز اۋرۋحانادان شىعارىلادى. تولىق ساۋىعىپ كەتۋى ءۇشىن وعان سىرقاتىنا بايلانىستى دەمالىس بەرىلەدى. ودان كەيىن ول ءوز اسكەري بولىمىندە قىزمەتىن جالعاستىرادى.
ايتا كەتەيىك، 27 قاڭتاردا اتالعان دەرەك بويىنشا گۆاردەيسك گارنيزونىنىڭ اسكەري پوليسياسى قىلمىستىق ءىس قوزعاعان. ماتەريالدار سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە ەنگىزىلگەن. قورعانىس مينيسترلىگى وقيعاعا قاتىسى بار بارلىق تۇلعالاردىڭ، سونىڭ ىشىندە جاعداي تۋرالى جوعارى قولباسشىلىققا دەر كەزىندە حابارلاماعان جانە مەديسينالىق كومەكتى ۇيىمداستىرۋدا ولقىلىقتارعا جول بەرگەن اسكەري ءبولىمنىڭ لاۋازىمدى تۇلعالارىنىڭ ارەكەتتەرىنە جان-جاقتى قۇقىقتىق باعا بەرىلەتىنىن مالىمدەدى.
