Syroejkinniń sottalǵany týraly aqparat aldymen áleýmettik jelide jariialanyp, artynan bul aqpartty Almaty qalalyq soty rastady. Sot úkimi osydan 3 kún buryn shyqqan.
- Osy jyldyń aqpanynda qytaitanýshy, Qytaidy jete biletin maman Konstantin Syroejkin qamaýǵa alynǵan edi. Oǵan "Otanyna opasyzdyq jasady" degen aiyp taǵyldy. Sot protsesi jabyq ótti. Syroejkindi 10 jylǵa bas bostandyǵynan aiyrý, jazasyn arnaiy qatań rejimdegi abaqtyda ótkizý, odan soń azamattyǵynan aiyrý jazasy kesilgeni belgili boldy, - dep jazdy qoǵam belsendisi Ǵalym Aqeleýov óz paraqshasynda.
Onyń aitýynsha Syroejkin kinásin moiyndamaǵan jáne apelliatsiialyq shaǵym berýden bas tartqan.
Saiasattanýshy Andrei Chebotarev qytaitanýshynyń qamalǵanyna ókinish bildirdi.
"Ókinishke orai, osylai boldy", - dep jazdy ol.
- Sot tolyqtai jabyq ótti. Sondyqtan buǵan bailanysty ázir birnárse aitý qiyn, - deidi ol.
Buǵan qatysty Ulttyq qaýipsizdik komiteti de málimdeme jasady.
- 2019 jyly 7 qazanda Almaty qalasynyń qylmystyq ister jónindegi mamandandyrylǵan aýdanaralyq soty 1956 jyly týylǵan QR azamaty Konstantin Lvovich Syroejkindi QR Qylmystyq kodeksiniń 175-baby 1-bóligi, iaǵni "Otanǵa opasyzdyq jasaý" boiynsha kináli dep taýyp, ony 10 jylǵa bas bostandyǵynan aiyrdy, dep habarlaidy QR UQK baspasóz qyzmeti.
Belgili bolǵandai Syroejkin jazasyn qatań rejimdegi qylmystyq-atqarý júiesi mekemesinde óteitin bolady.
Bostandyqqa shyqqannan keiin ol Qazaqstannan qýylyp, bes jylǵa deiin elge oralýyna tyiym salynady.
Osy jyldyń mamyrynda saiasattanýshy, professor Konstantin Syroejkinniń ustalǵany týraly aqparat taraǵan.
- 2019 jylǵy 15 qańtarda QR Ulttyq qaýipsizdik komiteti 1956 jyly týylǵan Qazaqstan Respýblikasynyń azamaty Konstantin Lvovich Syroejkinge qatysty, QR Qylmystyq kodeksiniń 175-baby, 2-tarmaǵy, iaǵni "Otanyna opasyzdyq jasaý" boiynsha qylmystyq is qozǵaldy. 19 aqpanda Almaty qalalyq tergeý sotynyń sheshimimen oǵan tutqyndaý sharasy belgilendi. Qazirgi ýaqytta tergeý amaldary júrgizilýde, – dep habarlaǵan edi QR UQK.
