Ortalyq "janýarlarǵa vaktsinanyń kúsheitilgen dozasy salynyp, onyń qaýipsizdigi men ýytty áseri muqiiat tekserilgenin" jáne "aǵzaǵa allergiialyq reaktsiiasynyń joqtyǵy anyqtalǵanyn" habarlady.
Vaktsina synaǵynyń ekinshi kezeńin qazanda bastamaq jáne ekpe 200 eriktige salynady dep josparlanǵan.
Qazir álemde koronavirýstyń jańa túrine qarsy júzden astam vaktsina synaqtap ótip jatyr. Buǵan deiin Qazaqstanda Resei biligi tirkegen, biraq DDSU kúmán keltirgen "Spýtnik" vaktsnasy kóp talqylandy. DDSU reseilik vaktsinanyń barlyq synaq kezeńinen ótkenine senbeidi. Máskeý bul kúdikti joqqa shyǵaryp otyr.
12 tamyzda Qazaqstan prezidenti Qasym-Jomart Toqaev kúzde Reseige vaktsinany satyp alý boiynsha kelissóz júrgizýge delegatsiia jiberetinin aitqan. Bul qoǵamda úlken talqy týdyryp, keiin Qazaqstan densaýlyq saqtaý ministrligi barlyq synaq kezeńinen ótpegen vaktsinalardy almaitynyn málimdegen. Eldiń bas sanitarlyq dárigeri Aijan Esmaǵambetova Qazaqstan naryqqa alǵash túsken vaktsinany satyp alatynyn aitqan.
Tamyzdyń basynda ministrlik vaktsina shyqsa, halyqtyń 11,5 paiyzyna - sozylmaly derti bar adamdarǵa, indetpen kúresetin dárigerlerge, virýs juqtyrsa qaýip tobynda bolatyndarǵa - tegin ekpe salatynyn málimdegen. Vedomstvo "halyqtyń qalǵan bóligi vaktsinany óz qarjysyna saldyrý kerek" dedi. Iaǵni, ekpeniń tólemi Meditsinalyq saqtandyrý qorynan (MSQ) tólenbeidi.
MSQ - halyqty tegin meditsinalyq kómekpen qamtamasyz etý úshin qurylǵan qor. Biyldan bastap resmi jumys isteitinder men ózin-ózi jumyspen qamtyǵandar ai saiyn jalaqysynyń bir bóligin osy qorǵa aýdaryp keledi.
