Memleket basshysy Qasym-Jomart Toqaevtyń AÓK áleýetin kúsheitý týraly tapsyrmasyna sáikes mashina-traktor parkin jedel jańartý jáne jergilikti aýyl sharýashylyǵy mashinalaryn jasaý kásiporyndaryn damytý tetigi ázirlendi. Ónerkásip jáne qurylys ministrligi Aýyl sharýashylyǵy ministrligimen birlesip, Qazaqstanda analogtary shyǵarylatyn sheteldik aýyl sharýashylyǵy tehnikalaryna sýbsidiia berýden bas tartýdy kózdeitin qujat qabyldady, - dep habarlaidy Dalanews.kz.
Qazirgi ýaqytta elimizde túrli qýattylyqtaǵy jáne modifikatsiiadaǵy traktor, astyq jinaý jáne jem-shóp jinaý kombaindarynyń 15-ten astam brendin shyǵaratyn 8 zaýyt jumys isteidi. 2023 jyldyń qorytyndysy boiynsha otandyq óndirýshiler 113,5 mlrd teńgege 5 418 traktor, 99,1 mlrd teńgege 1 032 kombain shyǵardy.
Buǵan deiin importtyq jáne otandyq tehnikaǵa beriletin sýbsidiialar kólemindegi aiyrmashylyq sheteldik óndirýshilerdiń paidasyna boldy. Máselen, ótemaqylar kóleminiń 28,3%-y jergilikti kásiporyndardy qoldaýǵa, 41,9%-y importqa jiberildi. Atalǵan tásil qazaqstandyq zaýyttardyń ónimderin satý kólemin azaitty. Jańa tetik boiynsha sheteldik óndirýshilerdi sýbsidiialaý úlesi shashamen 7 esege – 6,5%-ǵa deiin tómendetiletin bolady, bul rette otandyq óndirýshilerdiń úlesin 63,7%-ǵa deiin jetkizý josparlanyp otyr.
Premer-Ministr Oljas Bektenov óńirlerge jumys sapary barysynda ózgerister engizý qajet ekenin atap ótti: respýblika aýmaǵynda kásiporyndaryn lokalizatsiialaý úshin sheteldik tehnika óndirýshilerine basymdyq beriledi. Bul baǵytta Kazrost engineering Ltd, Claas jáne basqalary tabysty iske asyryldy.
Osylaisha, 2021 jyly «ST ESEMBLI» kásipornynda TUCANO 450 jáne TUCANO 580 kombaindaryn synaqtan ótkizý bastalǵan kezde Claas-pen arnaiy investitsiialyq kelisimshartqa qol qoiyldy. 2 jyldan keiin jergilikti óndirýshilerdiń komponentterin «Agromash Holding» AQ, «ShyǵysMash Zavod», «Raimann» JShS jetkize bastady. Kásiporynda 2023 jyly 246 birlik ózdiginen júretin tehnika jáne 158 tirkeme tehnika qurastyryldy. Biyl traktorlar qatary jańartylyp, keńeitildi. Zaýyt iske qosylǵan sátten bastap óndirispen qamtamasyz etilgen jumys oryndarynyń sany 2 esege artty – qazirgi tańda kásiporynda 73 qyzmetker jumys isteidi.
Sheteldik aýyl sharýashylyǵy tehnikasyn sýbsidiialaýdy alyp tastaýdyń Qazaqstanda óndirisi jolǵa qoiylmaǵan pozitsiialarǵa, atap aitqanda qant qyzylshasyn, maqta óndirýge, kartop, jemis-kókónis t.b. jinaýǵa mamandandyrylǵan tehnikalarǵa qatysy joq. Bul jaǵdaida óndiris eline qaramastan 25% deńgeiinde sýbsidiialaý normativi qarastyrylǵan.
Jalpy, qazaqstandyq aýyl sharýashylyǵy mashinasyn jasaý kásiporyndary qazirgi tańda naryqtyń 85-90%-yn qamtidy. Bul rette elimizde sharýalardyń shamamen 90%-yn shaǵyn jáne orta fermerler quraidy, olar úshin jeńildikti lizingtik quraldar men qoljetimdi tehnika mashina-traktor parkin jańartýǵa múmkindik beredi.
