وتاندىق اۋىل شارۋاشىلىعى تەحنيكاسىن وندىرەتىن كاسىپورىنداردى دامىتۋ تەتىگى ازىرلەندى

ساعىنىش سارداروۆا 18 مام. 2024 13:30 3115

مەملەكەت باسشىسى قاسىم-جومارت توقايەۆتىڭ اوك الەۋەتىن كۇشەيتۋ تۋرالى تاپسىرماسىنا سايكەس ماشينا-تراكتور پاركىن جەدەل جاڭارتۋ جانە جەرگىلىكتى اۋىل شارۋاشىلىعى ماشينالارىن جاساۋ كاسىپورىندارىن دامىتۋ تەتىگى ازىرلەندى. ونەركاسىپ جانە قۇرىلىس مينيسترلىگى اۋىل شارۋاشىلىعى مينيسترلىگىمەن بىرلەسىپ،  قازاقستاندا انالوگتارى شىعارىلاتىن شەتەلدىك اۋىل شارۋاشىلىعى تەحنيكالارىنا سۋبسيديا بەرۋدەن باس تارتۋدى كوزدەيتىن قۇجات قابىلدادى، - دەپ حابارلايدى Dalanews.kz.

قازىرگى ۋاقىتتا ەلىمىزدە ءتۇرلى قۋاتتىلىقتاعى جانە موديفيكاسياداعى تراكتور، استىق جيناۋ جانە جەم-شوپ جيناۋ كومبايندارىنىڭ 15-تەن استام برەندىن شىعاراتىن 8 زاۋىت جۇمىس ىستەيدى. 2023 جىلدىڭ قورىتىندىسى بويىنشا وتاندىق وندىرۋشىلەر 113،5 ملرد تەڭگەگە 5 418 تراكتور، 99،1 ملرد تەڭگەگە 1 032 كومباين شىعاردى.

بۇعان دەيىن يمپورتتىق جانە وتاندىق تەحنيكاعا بەرىلەتىن سۋبسيديالار كولەمىندەگى ايىرماشىلىق شەتەلدىك وندىرۋشىلەردىڭ پايداسىنا بولدى. ماسەلەن، وتەماقىلار كولەمىنىڭ 28،3%-ى جەرگىلىكتى كاسىپورىنداردى قولداۋعا، 41،9%-ى يمپورتقا جىبەرىلدى. اتالعان ءتاسىل قازاقستاندىق زاۋىتتاردىڭ ونىمدەرىن ساتۋ كولەمىن ازايتتى. جاڭا تەتىك بويىنشا شەتەلدىك وندىرۋشىلەردى سۋبسيديالاۋ ۇلەسى شاشامەن 7 ەسەگە – 6،5%-عا دەيىن تومەندەتىلەتىن بولادى، بۇل رەتتە وتاندىق وندىرۋشىلەردىڭ ۇلەسىن 63،7%-عا دەيىن جەتكىزۋ جوسپارلانىپ وتىر.

پرەمەر-مينيستر ولجاس بەكتەنوۆ وڭىرلەرگە جۇمىس ساپارى بارىسىندا وزگەرىستەر ەنگىزۋ قاجەت ەكەنىن اتاپ ءوتتى: رەسپۋبليكا اۋماعىندا كاسىپورىندارىن لوكاليزاسيالاۋ ءۇشىن شەتەلدىك تەحنيكا وندىرۋشىلەرىنە باسىمدىق بەرىلەدى. بۇل باعىتتا Kazrost engineering Ltd، Claas جانە باسقالارى تابىستى ىسكە اسىرىلدى.

وسىلايشا، 2021 جىلى «ست ەسەمبلي» كاسىپورنىندا TUCANO 450 جانە TUCANO 580 كومبايندارىن سىناقتان وتكىزۋ باستالعان كەزدە Claas-پەن ارنايى ينۆەستيسيالىق كەلىسىمشارتقا قول قويىلدى. 2 جىلدان كەيىن جەرگىلىكتى وندىرۋشىلەردىڭ كومپونەنتتەرىن «اگروماش حولدينگ» اق، «شىعىسماش زاۆود»، «رايمانن» ج ش س جەتكىزە باستادى. كاسىپورىندا 2023 جىلى 246 بىرلىك وزدىگىنەن جۇرەتىن تەحنيكا جانە 158 تىركەمە تەحنيكا قۇراستىرىلدى. بيىل تراكتورلار قاتارى جاڭارتىلىپ، كەڭەيتىلدى. زاۋىت ىسكە قوسىلعان ساتتەن باستاپ وندىرىسپەن قامتاماسىز ەتىلگەن جۇمىس ورىندارىنىڭ سانى 2 ەسەگە ارتتى – قازىرگى تاڭدا كاسىپورىندا 73 قىزمەتكەر جۇمىس ىستەيدى.

شەتەلدىك اۋىل شارۋاشىلىعى تەحنيكاسىن سۋبسيديالاۋدى الىپ تاستاۋدىڭ قازاقستاندا ءوندىرىسى جولعا قويىلماعان پوزيسيالارعا، اتاپ ايتقاندا قانت قىزىلشاسىن، ماقتا وندىرۋگە، كارتوپ، جەمىس-كوكونىس ت.ب. جيناۋعا مامانداندىرىلعان تەحنيكالارعا قاتىسى جوق. بۇل جاعدايدا ءوندىرىس ەلىنە قاراماستان 25% دەڭگەيىندە سۋبسيديالاۋ ءنورماتيۆى قاراستىرىلعان.

جالپى، قازاقستاندىق اۋىل شارۋاشىلىعى ماشيناسىن جاساۋ كاسىپورىندارى قازىرگى تاڭدا نارىقتىڭ 85-90%-ىن قامتيدى. بۇل رەتتە ەلىمىزدە شارۋالاردىڭ شامامەن 90%-ىن شاعىن جانە ورتا فەرمەرلەر قۇرايدى، ولار ءۇشىن جەڭىلدىكتى ليزينگتىك قۇرالدار مەن قولجەتىمدى تەحنيكا ماشينا-تراكتور پاركىن جاڭارتۋعا مۇمكىندىك بەرەدى.


ۇسىنىلعان
سوڭعى جاڭالىقتار