«Qurmet» ordeniniń iegeri, «Qazaqstannyń eńbek sińirgen qairatkeri» Ulyqbek Esdaýlet týǵan jerine kelip, oqyrmandary men tvorchestvolyq qaýymǵa ádemi, máni men mazmuny tereń kesh syilady.
- Árbir azamat týǵan jerine kelip, topyraǵyn iiskep, halqyn kórgen kezde shabyt alady. Biz de búgin elimizge kelip, sizdermen kezdesip otyrmyz. Osyndai jyly kezdesý uiymdastyryp, árdaiym ádebiet pen mádenietke qoldaý kórsetip otyrǵan oblys ákimi Danial Ahmetovqa rizashylyq bildiremiz, - dedi aqyn.
Oblystyq drama teatrynda ótken keshte aqynnyń óleńderi oqylyp, ánderi shyrqaldy. Oblys ákiminiń orynbasary Ásem Núsipova sahna tórinde oblys basshylyǵy atynan aqyndy mereitoiymen quttyqtap, iyǵyna shapan japty.
– Qazaq poeziiasynyń eńsesin biiktetip, ulttyq qadir-qasietin arttyrýda ózindik úles qosyp kele jatqan shoqtyǵy biik, kórnekti aqynsyz. Sizdiń óleńderińiz zaman aǵymyna sai jazylyp, oqyrmanyna jol tartýda. Árdaiym shabytyńyz talmai, áli talai shyǵarmashylyq eńbekterińizdiń kýási bolaiyq, - dedi Ásem Bekqyzy quttyqtaý sózinde.
Sonymen qatar, A.S. Pýshkin atyndaǵy oblystyq kitaphanada Ulyqbek Esdáýletpen «Jyrlarym – júregimniń jylnamasy» atty kezdesý ótti. Kezdesý barysynda barsha jyrsúier qaýym men shyǵarmashylyqqa jaqyn jandar aqynǵa Jazýshylar Odaǵyna qatysty kókeide júrgen saýaldaryn qoiyp, avtordyń aldaǵy josparlarymen tanysyp, erkin suhbattasa aldy.
Kezdesýdi Qazaqstan Jazýshylar odaǵy Shyǵys Qazaqstan oblystyq filialynyń tóraǵasy Álibek Qańtarbaev júrgizip, aqynnyń jaqyn dostarynyń biri, belgili qoǵam qairatkeri Túsipbekov Túsiphan Túsipbekuly, kórnekti aqyn Raiysova Baqytjan Muhtarhanqyzy jáne mádeniet salasynyń ókilderi jyly lebizderin arnaidy.
Kezdesý barysynda avtordyń «Zaman-ai» óleńi jaily Roza Rymbaevanyń beinejoldaýy tamashalandy. Sondai-aq, «Tamshy» shyǵarmashylyq jastarynyń oryndaýynda aqynnyń lirikalyq óleńderinen monolog oqylyp, barsha qonaqtar avtordyń jalyndy da imandylyqqa toly jyrlaryn óz aýzynan tyńdap, «Ular úndi Ulyqbek» atty kitap kórmesin tamashalady.
U. Esdáýlettiń eldik, ulttyq, adamgershilik múddelerge qyzmet etetin parasattylyǵyn kórsetetin óleńderi bir tóbe. Semei poligonynyń qasiretine arnalǵan «Zaman-ai» óleńi halyqaralyq antiiadrolyq qozǵalystyń gimnine ainalǵan. Qoǵamnyń ashy shyndyǵyn kórsetetin «Qara pima» poemasy zamanymyzdyń aiyqpas aýrýyn sóz etip, kópshilikke oi tastaityn, týra joldan adastyrmas imandylyq ainasy deýge bolady.
Qalamgerdiń óleńderi bolgar, aǵylshyn, túrik, hindi, qyrǵyz, ýkrain, belorýs, latysh jáne t.b. tilderge aýdarylǵan. Orys tilinde «Perevaly Altaia» (1988), «Ahillesova piata» (2002) óleńder men poemalar jinaǵy, qytai tilinde «Zaman-ai» (2005), qyrǵyz tilinde «Júregim - mahabbattyń astanasy» (2011) jyr jinaqtary jaryq kórgen. Sondai-aq, U. Esdáýletov A. Blok, N. Rýbtsov, O. Rifat, A. Rysqulov, B. Shinkýb, P. Movchan, S. Mýkkerdji jáne ózge de shetel aqyndarynyń óleńderin qazaqsha sóiletken.
Ásem Jylqysheva
