25 jeltoqsan kúni Óskemen qalasynda bes qabatty turǵyn úidiń kireberis esiginen jigitti toq soǵyp, ol aýyr jaraqat alyp, aýrýhanaǵa jetkizildi. Qazirgi ýaqytta ol jansaqtaý bóliminde jatyr, dep habarlaidy Dalanews.kz.
Oqiǵa Protozanov kóshesindegi №31 úide bolǵan. Turǵyndardyń aitýynsha, atalǵan úidiń domofonynan shamamen bir ai boiy adamdardy toq soǵyp kelgen. Alaida másele der kezinde sheshilmegen.
Kýágerlerdiń sózinshe, soqqan toqtyń kúshi sonshalyq, er adamdy birneshe metrge deiin laqtyryp jibergen. Turǵyndar birden jedel járdem shaqyrǵan. Dárigerler kelgen kezde jigittiń júregi toqtap qalǵany anyqtalyp, reanimatsiialyq sharalar júrgizilgen. Keiin ol shuǵyl túrde aýrýhanaǵa jetkizildi.
Turǵyndar jaǵdaiǵa alańdaýshylyq bildirip, kinálilerdiń jaýapqa tartylýyn talap etýde. Olardyń aitýynsha, úide qart adamdar kóp turady, al mundai qaýip kez kelgen ýaqytta qaitalanýy múmkin.
Óskemen qalasynyń ákimdigi oqiǵadan habardar ekenin málimdedi. Elektr toǵynyń taralý sebebin anyqtaý úshin oqiǵa ornyna “Istok” PIK qyzmetkerleri shaqyrylǵan.
Ákimdik málimetinshe, alǵashqy boljam boiynsha, toq soǵýdyń kózi “Alma domofon” JShS qyzmet kórsetetin domofon bolýy múmkin. Oqiǵa ornyna turǵyn úi qatynastary bólimi men Tehnikalyq basqarý ortalyǵynyń ókilderi baryp, tekserý jáne qalpyna keltirý jumystaryn júrgizgen. Qaýiptiń aldyn alý maqsatynda domofon elektr jelisinen ajyratylǵan.
Keiinirek ákimdik toq soǵýǵa esik jaqtaýyna ornatylǵan projektor shamy sebep bolýy múmkin ekenin habarlady. Atalǵan qurylǵy ajyratylyp, qaýip tolyq joiylǵan.
