Shyǵys Qazasqtan oblysy ortalyǵynda osymen ekinshi jyl qatarynan «Naýryz Jastar fest» jastar festivali ótti. Biylǵy festivaldiń byltyrǵydan aýqymy keńeiip, mán-maǵynasy arta túskendei. Muny shahardaǵy Komendantka skverinde uiymdastyrylǵan is-sharadan ańǵardyq, – dep habarlaidy Dalanews.kz.
Jalpy, Ulystyń Uly kúni qarsańynda jasqa da, jasamysqa da tamasha kóńil kúi syilaǵan bul is-sharanyń ótýine Óskemen qalasy ákimdiginiń Jastar resýrstyq ortalyǵy muryndyq bolǵanyn aitý kerek.
– Qalamyzda mundai is-sharalardy ótkizý dástúrge ainalyp keledi. Osy rette, Komendantka skverin tańdaýymyz beker emes. Óitkeni, bul – óskemendik jastardyń eń súiikti oryndarynyń biri. Búgin skver aýmaǵynda birneshe kiiz úi tigilip, altybaqan ornatyldy. Ózderińiz kórip turǵandai, qazir sporttyq jarystar ótýde. Negizi, «Naýryz Jastar fest» jastar festivali – túrli baiqaýlarymen erekshelenetin is-shara. Ondaǵy negizgi maqsat – ónerli jastardyń basyn qosyp, óskeleń urpaqqa Naýryz meiramyn dáripteý, – deidi Óskemen qalasy Jastar resýrstyq ortalyǵynyń direktory Baqytjan Erbolqyzy.
Óskemendikter men qala qonaqtaryna ulttyq qundylyqtarymyzdy, tól sportymyz ben salaýatty ómir saltyn nasihattaý maqsatynda qolǵa alynǵan biylǵy is-sharanyń taǵy bir ereksheligi sadaq atýdan saiystyń uiymdastyrylýy boldy. Sondai-aq festival aiasynda «Ómirimdi órnektegen ásem áýen» án saiysy, «Shuǵylaly kóktem» bi saiysy, «Uly dala úni» dombyrashylar saiysy, «Úzdik obraz» baiqaýy men asyq atý, arqan tartys, qoi kóterý, qol kúresi syndy sport túrlerinen jarystar ótip, merekeniń kórkin qyzdyrdy. Baǵy janǵan jeńimpazdar men júldegerlerge festivaldiń bas demeýshisi «Kaztsink» kompaniiasy atynan baǵaly syilyqtar tartý etildi.
– Maǵan Naýryz meiramy qarsańynda osyndai is-sharany ótkizý ideiasy óte unaidy. Mundai festivalderde jastar óz ónerlerin pash etip, ózge qyrynan tanyla alady. Búgin «Aq sáýlem» atty ándi oryndamaqshymyn. Kóńil-kúi keremet, buiyrsa júldege ilinemin dep otyrmyn, – deidi Leonard Ostrokostov esimdi stýdent.
Sondai-aq festival qonaqtary alańqaida tigilgen aqshańqan kiiz úilerge bas suǵyp, ulttyq taǵamdardan dám tatyp, kóne kartalardyń kórmesin tamashalady. Buǵan qosa altybaqanda terbelip, búrkitpen jáne tazymen sýretke túsýdiń oraiy keldi.
Al keshkisin Oraza tutqan jamaǵatqa aýyzashar berildi.
