Sot otyrysynda marqumdardyń týysy Ádemi Shylmaǵambetova jaýap berdi. Onyń aitýynsha, Naýryz Muqanǵalievke tiesili mal satyla bastaǵannan keiin olar kúdiktene bastaǵan, dep dalanews.kz tilshisi "Aq Jaiyq" basylymyna silteme jasap habarlaidy.
Áieldiń sózinshe, ol Naýryzben uialy bailanys arqyly habarlasa almaǵan. Telefony óshirýli bolǵan. Alaida WhatsApp arqyly habarlamalar kelip turǵan.
Ádemi Shylmaǵambetovanyń aitýynsha, ótken jyldyń qarasha aiynan bastap Sultan Sársemáliev ózin Naýryz retinde tanystyryp, týystaryna hat jazǵan. Ol habarlamalarda enesi Násip Óteshqalievanyń (Naýryz Muqanǵalievtiń anasy – red.) aiaǵy aýyryp, ony emdetý úshin Tashkentke aparyp jatqanyn aitqan. Sondai-aq emge aqsha kerek bolǵandyqtan, otbasynyń úi malyn sata bastaǵany túsindirilgen.
Advokattyń suraqtaryna jaýap bergen Ádemi Shylmaǵambetova Aqbaian Muqanǵalievanyń kúieýinen taiaq jegenin oǵan eshqashan aitpaǵanyn jetkizdi.
"Men odan: "Oilanyp kór, nege ketip bara jatyrsyń, besinshi balańa júkti emessiń be?" dep suradym. Ol Sultannyń basqa áielmen tósekte jatqan sýretin jibergennen keiin ajyrasýǵa sheshim qabyldaǵanyn aitty", – dedi ol sotta.
Sondai-aq marqumdardyń týysy aiyptalýshynyń Naýryz Muqanǵalievtiń ólimi abaisyzda boldy degen nusqasymen kelispeitinin málimdedi.
Onyń sózinshe, Naýryz "ózi janjal shyǵaratyn adam bolmaǵan".
Ádemi Shylmaǵambetova aldyn ala tyńdaýda Sársemáliev aitqan málimdemege de pikir bildirdi. Buǵan deiin aiyptalýshy qylmysqa Aqbaiannyń týystary olardyń qarym-qatynasyna aralasqany sebep boldy degen ýáj aitqan.
"Bul tutas bir otbasyn joiýǵa sebep bola ala ma?" – dedi ol sot zalynda.
Buǵan deiin Sársemáliev Maqsot Qarabalinge 9 ret, Násip Óteshqalievaǵa 8 ret, al Meiramgúl Qarabalinaǵa 32 ret pyshaq suqqanyn moiyndaǵan. Alaida Naýryz Muqanǵalievtiń ólimin qasaqana jasalmaǵan áreket dep ataǵan.
