Óskemende Ulystyń uly kúni — Naýryz meiramy qarsańynda oblys ortalyǵynda «altyn jastaǵy» azamattarǵa arnalǵan Belsendi uzaq ómir ortalyǵy saltanatty túrde ashyldy,- dep habarlaidy Dalanews.kz
Bul ortalyq – zeinetkerlerdiń ýaqytyn tiimdi ótkizip, salaýatty ómir saltyn ustanýyna, shyǵarmashylyqpen ainalysýyna múmkindik beretin mańyzdy joba. Ashylý saltanatynda oblys ákimi Nurymbet Saqtaǵanov jinalǵandardy quttyqtap, ortalyqtyń jumysyna sáttilik tiledi.
Shyǵys Qazaqstan oblysynda búginde 140 myńnan astam zeinetker bar. Óńir boiynsha qariialarymyzǵa bos ýaqyttaryn tiimdi paidalanýǵa múmkindik beretin barlyǵy 175 ortalyq jumys isteidi. Ol jerlerde egde azamattarǵa sportpen, shyǵarmashylyqpen ainalysýǵa múmkindikter berilgen, búginde «altyn jastaǵy» tórt myńnan astam adam osy ortalyqtarǵa belsendi túrde baryp, ýaqyttaryn qyzyqty ótkizip júr.
"Bizdiń maqsatymyz – osyndai ortalyqtarda sizderge bos ýaqyttaryńyzdy qyzyqty ári paidaly ótkizýge jaǵdai jasaý, qoǵamda uzaq ómir súrý mádenietin qalyptastyrý. Densaýlyqtaryńyzdy túzep, ózderińizdi kútińizder. Nemere, shóberelerińizdiń toiynda án salyp, bi bilep júrgenniń ózi baqyt emes pe?! Sizderge myqty densaýlyq tileimin. Aldaǵy ýaqytta osy baǵytta taǵy qandai jobalardy iske asyrýǵa bolatynyn oilastyryp, búgingi bastamany damyta beremiz", - dedi oblys basshysy Nurymbet Saqtaǵanov.
Ortalyqtyń direktory Marýa Ǵaisinanyń aitýynsha, qazirdiń ózinde toqsannan astam zeinetker ortalyqtyń ár túrli úiirmelerine qatysýǵa niet bildiripti.
"Bul jerdegi úiirmelerde bir mezgilde seksennen astam adamǵa bos ýaqyttaryn tiimdi ótkizýge jaǵdai jasalǵan. Egde jastaǵy turǵyndar ioga, horeografiia, bi úiirmelerine qatysyp, beineleý ónerimen, qoldanbaly qolónermen ainalysa alady. Sondai-aq mýzyka kabinetinde kelýshiler ártúrli mýzyka aspaptarynda oinap úirenedi. Dostyq úiimen jasalǵan memorandým aiasynda zeinetkerler bi úiirmelerine qatysa alady. Qazirdiń ózinde ortalyqta zýmba, tango jáne sporttyq bilerdi úiretý qolǵa alynǵan. Aldaǵy ýaqytta kelýshilerdi qyzyqtyrǵan barlyq baǵyttardy qamtityn bolamyz", - dedi Marýa Ǵaisina.
Tájiribeli dáriger, eńbek ardageri Baqyt Ziiadanova ortalyqtyń ashylýy egde jastaǵy azamattar úshin zor múmkindik ekenin atap ótti.
"Biz bul ortalyqtyń ashylýyn kópten kútken edik. Osyndai igi bastama kóterip, júzege asyrǵan ákimdikke, qoǵamdyq uiymdarǵa, ortalyq qyzmetkerlerine alǵysymyz sheksiz. Bul jer – bizdiń ekinshi úiimizge ainalady. Men ózim iogaǵa, bi men sýret úiirmesine jazyldym. Sonymen qatar trenajer zaly men emdik dene shynyqtyrý sabaqtaryna qatysamyn. Biz úshin bul ortalyqtyń mańyzy óte zor, sebebi ol uzaq ári sapaly ómir súrýge septigin tigizedi", – deidi ardager.
Mundai ortalyqtar egde jastaǵy azamattardyń ómir sapasyn jaqsartyp, olardy ózderin qoǵamnyń belsendi múshesi retinde sezinýge yqpal etedi. Jaqyn ýaqytta óńirde osyndai ortalyqtardyń sany artyp, qamtylatyn azamattar qatary kóbeimek. Jergilikti bilik bul baǵytta jumysty jalǵastyryp, zeinetkerler úshin jańa múmkindikter jasaýǵa nietti.
