D.Serikbaev atyndaǵy Shyǵys Qazaqstan tehnıkalyq ýnıversıtetinde 2025-2026 oqý jylynan bastap «Atom elektr stansıasyn paıdalaný» atty jańa bilim berý baǵdarlamasy iske qosylady,- dep habarlaıdy Dalanews.kz
Bul baǵdarlama Halyqaralyq atom energıasy agenttiginiń (MAGATE) sarapshylarynyń qatysýymen ázirlenip, elimizdegi alǵashqy atom elektr stansıasyna qajetti joǵary bilikti mamandardy daıarlaýǵa baǵyttalǵan.
Baǵdarlama «AES qurylysy baǵdarlamasyn qoldaý úshin bilim berý men kadrlardy daıarlaý salasyndaǵy ulttyq áleýetti nyǵaıtý jónindegi sarapshylar mısıasy» jáne «KAZ2010: Atom energetıkasy baǵdarlamasyn engizý úshin ınfraqurylymdy damytýǵa qoldaý (3-kezeń)» jobalary aıasynda jasaqtaldy.
MAGATE sarapshylarynyń usynystaryna sáıkes daıyndalǵan oqý jospary ıadrolyq energetıka salasynyń negizgi aspektilerin qamtıdy. Oqytylatyn pánder qatarynda atom stansıalarynyń jabdyqtary, ıadrolyq reaktorlar fızıkasy, radıasıalyq qaýipsizdik, ıadrolyq otyn sıkli, jabdyqty jańǵyrtý men montajdaý sıaqty mańyzdy baǵyttar bar. Sonymen qatar, stýdentter teorıalyq bilimmen qatar Kýrchatov qalasyndaǵy Ulttyq ıadrolyq ortalyqta jáne Óskemendegi metalýrgıalyq zaýytta tájirıbeden ótedi.
2025 jylǵy sáýirde ýnıversıtet qabyrǵasynda MAGATE men Reseıdegi Ulttyq zertteý ıadrolyq ýnıversıteti MIFI ókilderiniń qatysýymen halyqaralyq forým ótip, onda atom salasyndaǵy bilim berý men kadrlyq áleýetti damytý máseleleri talqylandy. Baǵdarlamanyń akademıalyq komıtetine ýnıversıtettiń jetekshi oqytýshylary men óndiris ókilderi kirdi, olardyń qatarynda «ÚMZ» AQ ǵylymı ortalyǵynyń bastyǵy Manarbek Qylyshqanov bar.
Sonymen qatar, 2025 jyldyń maýsymynda baǵdarlama oqytýshylary Aıjan Baıdildına men Nadejda Prohorenkova Vengrıadaǵy atom elektr stansıasynda taǵylymdamadan ótti. Al qazan aıynda mektep dekany Aıbek Aqaev Venada ótetin MAGATE-niń StarNet jelisi otyrysyna qatyspaq.
Baǵdarlama halyqaralyq ıadrolyq qaýipsizdik talaptaryna tolyq saı keledi. Bul óz kezeginde Qazaqstannyń atom energetıkasy salasyndaǵy kadrlyq rezervin qalyptastyryp qana qoımaı, eldiń energetıkalyq qaýipsizdigin nyǵaıtyp, tehnologıalyq táýekelderdi azaıtýǵa yqpal etedi. Baǵdarlama alǵashqy iske qosylǵan jyly-aq halyqaralyq standarttarǵa saı alǵashqy akredıtteýden ótýge daıyndalýda.
