Kólik ministri Marat Qarabaev osy jyly 12 myń shaqyrym jol jóndeýden ótetinin málimdedi, dep habarlaidy Dalanews.kz.
Ministr elimizdegi avtojoldardyń jai-kúiine toqtala otyryp, biyl jol jóndeý jumystarynda rekordtyq kórsetkish ornatylatynyn basa aitty.
"Osy jyly jol jóndeý jáne qurylys jumystary 12 myń shaqyrymdy qamtidy. Bul – buryn sońdy bolmaǵan rekordtyq kórsetkish. Bul rette, jóndeletin joldardyń 8 myń shaqyrymy – respýblikalyq, 4 myń shaqyrymy jergilikti jelige tiesili. Jyldyń sońyna deiin 7 myń shaqyrymda qurylys jáne jóndeý jumystary aiaqtalady", - dedi Qarabaev.
Qarabaevtyń sózinshe, respýblikalyq joldardy kútip ustaýǵa ǵana jyl saiyn 80 mlrd teńge qajet. Jalpy Qazaqstandaǵy avtojol uzyndyǵy 95 myń shaqyrymdy quraidy. Onyń 25 myń shaqyrymy respýblikalyq, al qalǵan 70 myń shaqyrymy jergilikti joldarǵa jatady.
"Respýblikalyq mańyzy bar 25 myń shaqyrym joldardy kútip ustaýǵa 80 mlrd teńge qajet. Sondyqtan, biýdjetke artyq salmaq túsirmeý úshin aqyly joldardy engizý jumystary jalǵasady. Búgingi tańda aqyly joldardyń jalpy uzyndyǵy — 3 myń 200 shaqyrym. Ótken jyldyń qorytyndysy boiynsha bul joldardan 30 mlrd teńge jinaldy", — dedi ol.
Ministr atalǵan qarajat joldy kútip ustaýǵa, aǵymdaǵy jóndeýge jáne tehnika satyp alýǵa jumsalǵanyn atap ótti.
"Rekonstrýktsiiadan ótken joldardy normativtik deńgeide kútip ustaý úshin biyl jalpy uzyndyǵy 2 myń shaqyrymnan asatyn 11 ýchaskege kezeń-kezeńimen aqy alýdy engizý josparlanyp otyr", — dedi Marat Qarabaev.
