Órt sóndirýshilerge órt ornyna jetýge kedergi keltirgen kólikterdi ádeii soǵyp buzýǵa ruqsat berý máselesi ázirge qoldaý tappady, dep habarlaidy dalanews.kz.
Premer-ministr Oljas Bektenov Májilis depýtaty Oljas Quspekovtiń saýalyna bergen jaýabynda tótenshe jaǵdai qyzmetkerlerine mundai ókilettik berý orynsyz dep sanalatynyn málimdedi.
Úkimet basshysynyń aitýynsha, qoldanystaǵy zańnamaǵa sáikes órt sóndirý kezinde memlekettik órtke qarsy qyzmet qyzmetkerleri qajet bolǵan jaǵdaida esikterdi, terezelerdi, shatyrlardy jáne basqa da qorshaý konstrýktsiialaryn, sonyń ishinde shlagbaýmdardy buzýǵa quqyly. Mundai sharalar órttiń taralýyna jol bermeý jáne ony jedel sóndirý maqsatynda qoldanylady.
Sonymen qatar premer-ministr kólik quraldaryn soǵyp nemese qasaqana búldirip jol ashý tetigin engizý tiimsiz ekenin atap ótti.
«Kólik quraldaryn qasaqana zaqymdaý máselesi ýákiletti organdar tarapynan orynsyz dep esepteledi. Sebebi kedergiler bolǵan jaǵdaida órtti sóndirýdiń ártúrli tásilderi bar. Tyǵyz qurylys salynǵan aýmaqtardaǵy órt kezinde arnaiy algoritmge sáikes órt sóndirýshilermen birge politsiia qyzmetkerleri de shyǵyp, jolǵa kedergi keltirgen kólikterdi májbúrli túrde evakýatsiialaý jumystaryn júrgizedi», – delingen jaýapta.
Budan bólek, Úkimet kópqabatty turǵyn úilerdiń mańynda órt tehnikasyna arnalǵan arnaiy alańdar salýdy mindetteitin qurylys normalaryna ózgerister ázirlep jatqanyn habarlady.
Jańa talaptarǵa sáikes turǵyn úi keshenderiniń janynda kólemi keminde 15h6 metr bolatyn, arnaiy jol belgileri men tańbalary bar órt tehnikasyn ornalastyrý alańdary qarastyrylýy múmkin.
Eske salaiyq, buǵan deiin Astanadaǵy kópqabatty turǵyn úide bolǵan órt kezinde aýlaǵa kiretin joldyń jabyq bolýy men kólikterdiń retsiz qoiylýy qutqarý jumystaryna kedergi keltirgen edi. Osy oqiǵadan keiin depýtattar tótenshe qyzmetterdiń ókilettikterin keńeitý máselesin kótergen bolatyn.
