Atyraýlyq órt sóndirýshi – Erlan Dáýletov
Búgin de osy sala mamandarynyń qaltarysta qalyp qoiǵan batyrlyqtaryn sýyrtpaqtamaq boldyq, árine, az-kem derekpen. Áitpese, olardyń árqaisysy týraly kitap jazýǵa bolady.
Tótenshe jaǵdailar ministrliginiń baspasóz qyzmeti atyraýlyq órt sóndirýshi Erlan Dáýletovtyń kúndelikti jumysynan derektermen bólisti. Ol – Atyraý oblysy Tótenshe jaǵdailar departamenti Órt sóndirý jáne avariialyq-qutqarý jumystary qyzmeti №13 mamandandyrylǵan órt sóndirý bóliminiń komandiri. Azamattyq qorǵaý organdarynda 2011 jyldan beri qyzmet etip keledi eken. Osy ýaqyt ishinde qala aýmaǵynda birneshe ret oryn alǵan iri órtterdi joiýǵa jáne apattyq-qutqarý jumystaryna qatysyp, erlik pen qyzmettegi sheberligin jan-jaqty dáleldegen.
Máselen, 2022 jyldyń 8 qańtarynda departamenttiń dispetcherlik bólimine Atyraýdaǵy «Nursaia» yqshamaýdanynda ornalasqan páterden tútin shyǵyp jatqany týraly qońyraý túsedi. Oqiǵa ornyna jedel jetken qutqarýshylar aldymen órttiń qaidan shyǵyp jatqanyn anyqtady.
Birinshi bólimshe birden «1 V» bóshkesin gaz-tútinnen qorǵaý qyzmetine qosý arqyly janý ortalyǵyna jalǵady. Al ekinshi sektsiia, iaǵni Erlan Dáýletov jasaq komandiriniń buiryǵymen tynys alý apparatyna qosylyp, osy úidiń turǵyndaryn taza aýaǵa shyǵaryp, evakýatsiialaý jumystaryn júrgizedi.
Órt kezinde 10 eresek azamat pen 9 bala tútinniń qursaýynda qalyp, kóshege ózdiginen shyǵa almai qalǵan eken. Keiipkerimizdiń shapshańdyǵy, jedeldigi, sheberliginiń arqasynda barlyǵy din aman qaýipsiz aimaqqa kóshirildi.
Demek, keiipkerimiz bastaǵan jeke quramnyń jedel áreketiniń arqasynda turǵyn úiden 9 balanyń ómiri aman qaldy. Órt sóndirýshiler de órttiń kórshi turǵyn úige taralýynyń aldyn alyp úlgerdi.
Biz Arslan Qurmanbekovtiń esimin máńgi qurmet tutýymyz kerek
Batyrlarymyzdyń qatarynda qyzmettik boryshyn ótei júrip, kóz jumǵandary qanshama. Olar týraly bir aýyz aitpaý, esimderin atamaý – qiianat. Mysaly, Almaty qalasy Tótenshe jaǵdailar departamentiniń qyzmetkeri taýdaǵy órtti sóndirý kezinde qaza tapqanyn eshqaisymyz umyta qoiǵan joqpyz. Osyldyń mamyrynda ǵana, mamyrajai kúnderdiń birinde arystai azamatymyzdan aiyrylyp qalǵanbyz.
Almaty qalalyq Tótenshe jaǵdailar departamentiniń qyzmetkeri taý baýraiyndaǵy órtti sóndirý kezinde máńgilik saparǵa attanyp kete barǵan. Álbette, jazataiym oqiǵa deý salý – op-ońai. Ol taýdaǵy órttiń qalai shyqqanyn bilesiz be? Jái ǵana bir qamsyz júrgenderdiń laqtyra salǵan temeki tuqylynan paida bolǵan. Bul týraly qalalyq tótenshe jaǵdailar departamentiniń Instagram-daǵy resmi paraqshasynda jazyldy. Birneshe BAQ jarysa jazdy sodan soń. Endigi bul qaiǵyly oqiǵa da ótkenniń kórpesin jamylyp jatyr.
«Búgin túnde qyzmettik mindetin atqarý kezinde – taý betkeiindegi órtti sóndirý barysynda Almaty qalasy TJD Órt sóndirý jáne avariialyq-qutqarý jumystary qyzmetiniń 1994 jyly týǵan qyzmetkeri, PCh-7 aǵa órt sóndirýshi-qutqarýshysy, azamattyq qorǵaý serjanty Arslan Joldasbekuly Qurmanbekov qaitys boldy», - dep habarlady sol tusta qalalyq Tótenshe jaǵdailar departamenti.
Tótenshe jaǵdailar ministrligi óziniń resmi Telegram-arnasynda Qurmanbekovtiń janyp jatqan aǵash dińiniń qulaýynan alǵan jaraqaty saldarynan mert bolǵany anyqtalǵanyn málimdedi. Tótenshe jaǵdailar ministrligi Arslannyń otbasy men jaqyndaryna kóńil aityp, onyń otbasyna jan-jaqty kómek pen qoldaý kórsetti.
«Arslan jaýapty qyzmetker, kásibi kúresker jáne bilikti maman boldy, jumysta eńbekqorlyǵymen, ádildigimen jáne mamandyǵyna degen súiispenshiligimen baǵalandy», - dep eske alady qaisar uldy áriptesteri.
Tótenshe jaǵdailar ministrliginiń málimetinshe, Arslan Qurmanbekov 1994 jyly 23 tamyzda Almaty oblysynda dúniege kelgen. Azamattyq qorǵaý organdarynda 2015 jyldyń 14 jeltoqsanynan beri eńbek etip kelgen. Eske sala keteiik, ótken jyldyń qarasha aiynda Astanada páter órtengen bolatyn.
Jas maman – Ramazan Smaiylov
Kezekti keiipkerimiz retinde jas maman Ramazan Smaiylovty tańdadyq. Ramazan Smaǵululy eki jyldan beri azamattyq qorǵaý organdarynda qyzmet etip keledi. Jambyl oblysy Tótenshe jaǵdailar departamenti Órt sóndirý jáne avariialyq-qutqarý jumystary qyzmeti №2 mamandandyrylǵan órt sóndirý bóliminiń aǵa órt sóndirýshi-qutqarýshysy. Osy qysqa jumys ýaqytynda ol ózin jaýapty jáne óte eńbekqor qyzmetker retinde kórsete bildi.
2021 jyldyń tamyz aiynda Ramazan Smaiylov kezekshi kúzet quramynda Baizaq aýdanyndaǵy áskeri bólimde oryn alǵan alapat jarylystyń órtin sóndirýge attanǵan. Órt ornyna barlyǵy 31 tehnika men 114 jeke quramnan turatyn kúshter men quraldar jiberildi. Garnizon tótenshe jaǵdaidyń kúrdeligine bailanysty kóterildi.
Bastapqy kezeńde qoima qaqpalaryna monitorlar arqyly sý jiberilip, nátijesinde jaqyn mańdaǵy eldi mekenderdiń turǵyndaryn evakýatsiialaý ýaqyty únemdeldi. Ol órtti sóndirýge qatysyp, oq-dárilerdiń alǵashqy jarylystarynan keiin aýyr jaraqat alyp, nátijesinde Taraz qalasyndaǵy №1 qalalyq aýrýhananyń jansaqtaý bólimine shuǵyl jetkizildi.
R.S: Mine, batyrlardyń eńbek jolyndaǵy qaltarys-bultarysy osyndai. Biri erjúrektiligimen eline áli kúnge qyzmet etip júr. Ár kúni qaýip pen qaterge toly. Sonda da mamandyǵyn súiedi, jaqsy kóredi. Óitkeni, halqynyń basyna kún týǵanda, oǵan kómek qolyn sozýdy ózine paryz, borysh sanaidy. Endi biri eren erliktiń úlgisin kórsetip, ózin mert etti. Onyń esimi tarihtyń sarǵysh paraǵynda máńgi qalýy tiis. Taǵy biri jaraqat alyp, es-tússiz aýrýhanaǵa jetkiziledi. Ol óziniń eli úshin densaýlyǵyn qurban etti...
