اتىراۋلىق ءورت ءسوندىرۋشى – ەرلان داۋلەتوۆ
بۇگىن دە وسى سالا ماماندارىنىڭ قالتارىستا قالىپ قويعان باتىرلىقتارىن سۋىرتپاقتاماق بولدىق، ارينە، از-كەم دەرەكپەن. ايتپەسە، ولاردىڭ ءارقايسىسى تۋرالى كىتاپ جازۋعا بولادى.
توتەنشە جاعدايلار مينيسترلىگىنىڭ باسپا ءسوز قىزمەتى اتىراۋلىق ءورت ءسوندىرۋشى ەرلان داۋلەتوۆتىڭ كۇندەلىكتى جۇمىسىنان دەرەكتەرمەن ءبولىستى. ول – اتىراۋ وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №13 مامانداندىرىلعان ءورت ءسوندىرۋ ءبولىمىنىڭ كومانديرى. ازاماتتىق قورعاۋ ورگاندارىندا 2011 جىلدان بەرى قىزمەت ەتىپ كەلەدى ەكەن. وسى ۋاقىت ىشىندە قالا اۋماعىندا بىرنەشە رەت ورىن العان ءىرى ورتتەردى جويۋعا جانە اپاتتىق-قۇتقارۋ جۇمىستارىنا قاتىسىپ، ەرلىك پەن قىزمەتتەگى شەبەرلىگىن جان-جاقتى دالەلدەگەن.
ماسەلەن، 2022 جىلدىڭ 8 قاڭتارىندا دەپارتامەنتتىڭ ديسپەچەرلىك بولىمىنە اتىراۋداعى «نۇرسايا» ىقشاماۋدانىندا ورنالاسقان پاتەردەن ءتۇتىن شىعىپ جاتقانى تۋرالى قوڭىراۋ تۇسەدى. وقيعا ورنىنا جەدەل جەتكەن قۇتقارۋشىلار الدىمەن ءورتتىڭ قايدان شىعىپ جاتقانىن انىقتادى.
ءبىرىنشى بولىمشە بىردەن «1 ۆ» بوشكەسىن گاز-تۇتىننەن قورعاۋ قىزمەتىنە قوسۋ ارقىلى جانۋ ورتالىعىنا جالعادى. ال ەكىنشى سەكسيا، ياعني ەرلان داۋلەتوۆ جاساق كومانديرىنىڭ بۇيرىعىمەن تىنىس الۋ اپپاراتىنا قوسىلىپ، وسى ءۇيدىڭ تۇرعىندارىن تازا اۋاعا شىعارىپ، ەۆاكۋاسيالاۋ جۇمىستارىن جۇرگىزەدى.
ءورت كەزىندە 10 ەرەسەك ازامات پەن 9 بالا ءتۇتىننىڭ قۇرساۋىندا قالىپ، كوشەگە وزدىگىنەن شىعا الماي قالعان ەكەن. كەيىپكەرىمىزدىڭ شاپشاڭدىعى، جەدەلدىگى، شەبەرلىگىنىڭ ارقاسىندا بارلىعى ءدىن امان ءقاۋىپسىز ايماققا كوشىرىلدى.
دەمەك، كەيىپكەرىمىز باستاعان جەكە قۇرامنىڭ جەدەل ارەكەتىنىڭ ارقاسىندا تۇرعىن ۇيدەن 9 بالانىڭ ءومىرى امان قالدى. ءورت سوندىرۋشىلەر دە ءورتتىڭ كورشى تۇرعىن ۇيگە تارالۋىنىڭ الدىن الىپ ۇلگەردى.
ءبىز ارسلان قۇرمانبەكوۆتىڭ ەسىمىن ماڭگى قۇرمەت تۇتۋىمىز كەرەك
باتىرلارىمىزدىڭ قاتارىندا قىزمەتتىك بورىشىن وتەي ءجۇرىپ، كوز جۇمعاندارى قانشاما. ولار تۋرالى ءبىر اۋىز ايتپاۋ، ەسىمدەرىن اتاماۋ – قيانات. مىسالى، الماتى قالاسى توتەنشە جاعدايلار دەپارتامەنتىنىڭ قىزمەتكەرى تاۋداعى ءورتتى ءسوندىرۋ كەزىندە قازا تاپقانىن ەشقايسىمىز ۇمىتا قويعان جوقپىز. وسىلدىڭ مامىرىندا عانا، مامىراجاي كۇندەردىڭ بىرىندە ارىستاي ازاماتىمىزدان ايىرىلىپ قالعانبىز.
الماتى قالالىق توتەنشە جاعدايلار دەپارتامەنتىنىڭ قىزمەتكەرى تاۋ باۋرايىنداعى ءورتتى ءسوندىرۋ كەزىندە ماڭگىلىك ساپارعا اتتانىپ كەتە بارعان. البەتتە، جازاتايىم وقيعا دەۋ سالۋ – وپ-وڭاي. ول تاۋداعى ءورتتىڭ قالاي شىققانىن بىلەسىز بە؟ ءجاي عانا ءبىر قامسىز جۇرگەندەردىڭ لاقتىرا سالعان تەمەكى تۇقىلىنان پايدا بولعان. بۇل تۋرالى قالالىق توتەنشە جاعدايلار دەپارتامەنتىنىڭ Instagram-داعى رەسمي پاراقشاسىندا جازىلدى. بىرنەشە ب ا ق جارىسا جازدى سودان سوڭ. ەندىگى بۇل قايعىلى وقيعا دا وتكەننىڭ كورپەسىن جامىلىپ جاتىر.
«بۇگىن تۇندە قىزمەتتىك مىندەتىن اتقارۋ كەزىندە – تاۋ بەتكەيىندەگى ءورتتى ءسوندىرۋ بارىسىندا الماتى قالاسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ 1994 جىلى تۋعان قىزمەتكەرى، پچ-7 اعا ءورت ءسوندىرۋشى-قۇتقارۋشىسى، ازاماتتىق قورعاۋ سەرجانتى ارسلان جولداسبەك ۇلى قۇرمانبەكوۆ قايتىس بولدى»، - دەپ حابارلادى سول تۇستا قالالىق توتەنشە جاعدايلار دەپارتامەنتى.
توتەنشە جاعدايلار مينيسترلىگى ءوزىنىڭ رەسمي Telegram-ارناسىندا قۇرمانبەكوۆتىڭ جانىپ جاتقان اعاش ءدىڭىنىڭ قۇلاۋىنان العان جاراقاتى سالدارىنان مەرت بولعانى انىقتالعانىن مالىمدەدى. توتەنشە جاعدايلار مينيسترلىگى ارسلاننىڭ وتباسى مەن جاقىندارىنا كوڭىل ايتىپ، ونىڭ وتباسىنا جان-جاقتى كومەك پەن قولداۋ كورسەتتى.
«ارسلان جاۋاپتى قىزمەتكەر، كاسىبي كۇرەسكەر جانە بىلىكتى مامان بولدى، جۇمىستا ەڭبەكقورلىعىمەن، ادىلدىگىمەن جانە ماماندىعىنا دەگەن سۇيىسپەنشىلىگىمەن باعالاندى»، - دەپ ەسكە الادى قايسار ۇلدى ارىپتەستەرى.
توتەنشە جاعدايلار مينيسترلىگىنىڭ مالىمەتىنشە، ارسلان قۇرمانبەكوۆ 1994 جىلى 23 تامىزدا الماتى وبلىسىندا دۇنيەگە كەلگەن. ازاماتتىق قورعاۋ ورگاندارىندا 2015 جىلدىڭ 14 جەلتوقسانىنان بەرى ەڭبەك ەتىپ كەلگەن. ەسكە سالا كەتەيىك، وتكەن جىلدىڭ قاراشا ايىندا استانادا پاتەر ورتەنگەن بولاتىن.
جاس مامان – رامازان سمايىلوۆ
كەزەكتى كەيىپكەرىمىز رەتىندە جاس مامان رامازان سمايىلوۆتى تاڭدادىق. رامازان سماعۇل ۇلى ەكى جىلدان بەرى ازاماتتىق قورعاۋ ورگاندارىندا قىزمەت ەتىپ كەلەدى. جامبىل وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №2 مامانداندىرىلعان ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى. وسى قىسقا جۇمىس ۋاقىتىندا ول ءوزىن جاۋاپتى جانە وتە ەڭبەكقور قىزمەتكەر رەتىندە كورسەتە ءبىلدى.
2021 جىلدىڭ تامىز ايىندا رامازان سمايىلوۆ كەزەكشى كۇزەت قۇرامىندا بايزاق اۋدانىنداعى اسكەري بولىمدە ورىن العان الاپات جارىلىستىڭ ءورتىن سوندىرۋگە اتتانعان. ءورت ورنىنا بارلىعى 31 تەحنيكا مەن 114 جەكە قۇرامنان تۇراتىن كۇشتەر مەن قۇرالدار جىبەرىلدى. گارنيزون توتەنشە جاعدايدىڭ كۇردەلىگىنە بايلانىستى كوتەرىلدى.
باستاپقى كەزەڭدە قويما قاقپالارىنا مونيتورلار ارقىلى سۋ جىبەرىلىپ، ناتيجەسىندە جاقىن ماڭداعى ەلدى مەكەندەردىڭ تۇرعىندارىن ەۆاكۋاسيالاۋ ۋاقىتى ۇنەمدەلدى. ول ءورتتى سوندىرۋگە قاتىسىپ، وق-دارىلەردىڭ العاشقى جارىلىستارىنان كەيىن اۋىر جاراقات الىپ، ناتيجەسىندە تاراز قالاسىنداعى №1 قالالىق اۋرۋحانانىڭ جانساقتاۋ بولىمىنە شۇعىل جەتكىزىلدى.
ر.S: مىنە، باتىرلاردىڭ ەڭبەك جولىنداعى قالتارىس-بۇلتارىسى وسىنداي. ءبىرى ەرجۇرەكتىلىگىمەن ەلىنە ءالى كۇنگە قىزمەت ەتىپ ءجۇر. ءار كۇنى ءقاۋىپ پەن قاتەرگە تولى. سوندا دا ماماندىعىن سۇيەدى، جاقسى كورەدى. ويتكەنى، حالقىنىڭ باسىنا كۇن تۋعاندا، وعان كومەك قولىن سوزۋدى وزىنە پارىز، بورىش سانايدى. ەندى ءبىرى ەرەن ەرلىكتىڭ ۇلگىسىن كورسەتىپ، ءوزىن مەرت ەتتى. ونىڭ ەسىمى تاريحتىڭ سارعىش پاراعىندا ماڭگى قالۋى ءتيىس. تاعى ءبىرى جاراقات الىپ، ەس-تۇسسىز اۋرۋحاناعا جەتكىزىلەدى. ول ءوزىنىڭ ەلى ءۇشىن دەنساۋلىعىن قۇربان ەتتى...
