Jýrnalist Ibrash Núsipbaev buǵan narazylyq bildirip otyr.
"Odaqtasymyzdyń turǵyndary Japoniiadan jappai kólik ákelip jatyr. Olardy eski-qusqy deýge kelmeidi. Japon mingen mashina kútimdi keledi. Máselen, mamyr aiynyń basynan beri reseilikter japon jerinen júzdegen, myńdaǵan kólik satyp alǵan. Bul kórsetkish kólik saýdasy qyzǵan 2008 jylǵy mejeden de asyp tústi.
Bul nemen bailanysty? Birinshiden, Reseige jańa kólik tasymaldanbaidy.
Ekinshiden, Reseide dollardy qoldan quldyratyp otyr. Saiyp kelgende, dollardan ienge shaqqanda japonnyń "úsh jyldyq" kólikteri tipten sý teginge satylyp jatyr. Japoniiadaǵy temir tulpardyń tehnikalyq jaǵdaiynda min joq, kóp júrilmegen, qoldan qolǵa ótpegen", – deidi jýrnalist.
Máselen, 2019 jyly qurastyrylǵan jap-jańa Toyota Land Cruiser Prado-ny 25-30 myń dollarǵa satyp alýǵa bolady.
Ony Reseige jetkizý úshin 250 dollar tóleisiz, ári ketkende bir ai kútesiz. Tezdetip jetkizip berýdi qalasańyz tasymalǵa 1000 dollar shyǵyndaisyz.
"Pýtin biligi reseilikterge japonnyń kóligin jappai satyp alýǵa ruqsat berdi, onymen qoimai GLONASS júiesin ornatý týraly mindetti talapty alyp tastady.
Al Qazaqstan azamattaryna japondyq kólikterdi satyp alýǵa úzildi-kesildi tyiym salynǵan. Sebebi, Reseimen aradaǵy kelisimshartqa sáikes bizge Japoniiadan kólik alýǵa ruqsat etilmeidi.
Bizdiń sheneýnikterge qoiar saýalym bar: Resei memleketaralyq kelisimdi buzyp otyrsa, biz nege ony múltiksiz oryndaýǵa mindettimiz? Resei odaqtyń talap-shartyna pysqyrmaidy eken, endeshe biz nege óz múddemizge qaishy kelýge tiispiz? Qazaqstandyqtar japonnyń arzan baǵady kóligin minýge laiyq emes pe!", – deidi Ibrash Núsipbaev.
