Zelenskii bul týraly NOS telearnasyna bergen suhbatynda aitty dep habarlaidy Dalanews.kz.
Kievti "orys áleminiń" ajyramas bólshegi dep paiymdaǵan Pýtin ońbai qatelesken. Ýkrainany eki-úsh kúnniń ishinde jaýlap alýdy kózdegen Kreml "jergilikti halyq orys basqynshylaryn qushaq jaia qarsy alady" dep topshylaǵan.
"Pýtin shapqynshylyǵy ýkrain halqynyń ashý-yzasyna tidi. Kúlli el agressorǵa qarsy dúr kóterildi. "Orys álemi" deitin totalitarlyq júieniń shańyraǵy shaiqalyp tur. KSRO-nyń shekpeninen shyqqan elderdi túgeldei osy keńistikke kirgizip jibergen Máskeýdiń beti qaityp, aryny basylyp qaldy. Áitse de súiekke sińgen ádetinen aryla almai júr.
Pýtin Ýkrainany "orys áleminiń" bir pushpaǵy dep sanaidy. Kievtiń Kremlden áldeqashan teris ainalǵanyn, orystyń qundylyqtaryn sypyryp-súiirip kúresinge laqtyrǵanyn qabyldaǵysy kelmeidi. Osy oi aqyr sońy Pýtinniń túbine jetedi", – deidi Zelenskii.
Onyń aitýynsha Kreml basshysy Reseidiń armiiasyn asyra baǵalap jibergen. Jer jaǵdaiyn bilmeitin, áskeri tehnikasy sonaý Sovet dáýirinen beri jańarmaǵan, jemqorlyqqa shylanǵan orys áskeri Ýkrain jerinde qoisha qyrylǵan.
"Orys álemi" deitin kontseptsiianyń áldeqashan súikimi ketken. Ýkrain halqy orys áleminen aýlaq júrgendi qalaidy. Olardyń ói-óresi, tanym-talǵamy orystyń patshany pir tutatyn quldyq sanasynan biik tur.
Sói degen Zelenskii:
"Ýkrain halqy eshkimge soqtyqpai, óz elinde emin-erkin ómir súrgisi keledi. Bógde elge basyp kirgen Pýtinniń kózin shel basty ma, áiteýir óz áskeriniń áleýetin shynaiy baǵalai almady. Ýkrain jerinde qaza tapqan orys okkýpanttarynyń sanynda esep joq", – deidi Zelenskii.
...
Onyń pikirinshe Ýkraina 2014 jyldan beri soǵys jaǵdaiynda ómir keship keledi. Sol kezden beri jinalǵan tájiribeniń arqasynda Pýtin shapqynshylyǵyna tótep bergen. Sóite tura Batys elderiniń birazy Kievtiń basqynshynyń betin qaitararyna kúmánmen qaraǵan.
"Kremldiń kúnderdiń - kúni shekara shebimizdi buzyp, basyp kirerin bilip júrdik. Agressor kez-kelgen ýaqytta azýyn batyrýy múmkin edi. AQSh-tyń barlaý qyzmeti shekara mańyndaǵy halyqty eldiń batys óńirine kóshirýdi usyndy, al áskerge jappai okop qazýǵa keńes berdi. Olar bizge sengen joq, Ýkrainanyń tabandylyq tanytaryna kúmánmen qarady", – deidi Zelenskii.
Kiev Batystyń usynysynan bas tartqan, sebebi el ishinde alasapyran týǵyzýdy qalamaǵan. Búiter bolsa Ýkrain ekonomikasy kópke uzamai kúirep tynar edi. Ulttyq valiýta kúrt quldyrap, sheteldik kompaniialar elden ketýge asyǵar edi.
Zelenskiidiń aitýynsha, bul sheshim aqyr sońy óziniń durystyǵyn dáleldegen.
